Тускай шериг операциязының үезинде дайынчы даалгазын күүседип тургаш, маадырлыы-биле амы-тынындан чарылган Альберт Николаевич Монгуштуң чырык адын мөңгежиткен мемориалдыг самбыраны болгаш «Маадырның партазын» Ак-Довурак хоорайда ооң бодунуң өөренип чораан 3 дугаар школазынга ажыткан.
Кады өөренип чораан эш-өөрү, дөргүл-төрели болгаш “Ада-чурттуң камгалакчылары” күрүне фондузунуң Тывада регионалдыг салбырының даргазы Мерген Кызыл-оол дээш өскелер-даа хемчегге кээп киришкен. Школаның коридорунда Альберт Монгуштуң амыдырал-чуртталгазын болгаш маадырлыг чоруунуң дугайында делгелгени салган.
«Маадырларны утпас болза, олар кажан-даа өлбес. Бөгүн Ак-Довурак хоорайның 3 дугаар школазынга эргим киживистиң адынга мөңгежидип «Маадырның партазын» ажыдып турарывыс бо» — деп, Альберт Монгуштуң кады төрээни Аяна Монгуш чугаалаан.
Кады шериг албан-хүлээлгезин күүседип чораан эштери Айдыс Сундуй, Орлан Ортун-Назын база келген.
«2017 чылда Чечен Республикага 60 хире тывалар чеде берген бис. Альберт-биле 1 дугаар батальонга чаңгыс ротага дайылдажып турган бис. Эживисти кажан-даа утпас, сактып чоруур бис» — деп, Орлан Ортун-Назын чугаалаан.
Айдың ОНДАР.
«Шын» №75 2023 чылдың октябрь 4