Маадырларга мөңге алдар!

Апрель 8-те, Республиканың кадет школа-интернадынга тураскаал самбыра болгаш маадырларның парталарын тургускан хемчег болуп эрткен. Ону тускай шериг операциязының үезинде маадырлыы-биле чок болган ук школаның эрткен чылдарда доозукчулары – Алдын-Херел Чымбал-оол, Алдын-Херел Ховалыг болгаш Айвар Оюнга тураскаадып ажыткан.

Бодунуң берген даңгыраанга төнчүзүнге чедир шынчы болуп, шериг хүлээлгезин сыныш чок күүсеткеш, бажын салган аныяк оолдарга Эрес-дидим чорук дээш Орденни чок болган соонда тывыскан.

Болган хемчегге ТР-ниң Дээди Хуралының депутады Сергей Куулар, Тываның Шериг комиссариадындан Владимир Ондрак, Юнармияның регионалдыг штавының начальниги Айдың Шивидек, хөй-ниити организцияларның төлээлери, маадырларның чоок төрелдери, эштери киришкен.

Школа-интернаттың директору Сылдыс Монгуш боду шериг хөделиишкиннерниң хоочуну болгаш ук школаның доозукчуларының Төрээн чурт камгалаар ыдыктыг хүлээлгезин мурнунга сорулга кылдыр салып, эрес-дидими-биле ТШО-да киржип турарын улуг алдар-хүндү кылдыр хүлээп, үнелеп турарын чугаалаан. Ол ышкаш амгы үеде ТШО-да школа-интернаттың доозукчуларының 70 хуузу киржип турарын демдеглээн.

“Бөгүн бис чажындан тура кижизидип өстүрген доозукчуларывыс, эрес-дидим оолдарывыска тураскаал бижиктиг самбыраны ажыдып, “Маадырның партазы” бүгү-российжи акцияга катчып тура, оларның маадырлыг чоруун кажан-даа утпас ужурлуг бис. Оларның эрес-дидим чоруу келир салгалдарга үлегер болуп артар дээрзин школавыска класс шактарынга, шугум чыскаалдарынга доктаамал чугаалап турар бис” — деп, директор түңнеп чугаалаан.

Тываның Шериг комиссариадындан төлээ Владимир Ондрак маадырларның дөргүл-төрелдеринге, башкыларынга, интернаттың удуртулгазынга ёзулуг төлептиг оолдарны кижизидип өстүргени дээш мөгейип, четтиргенин илереткен.

Болган хемчегге “Кара ирбиш” вокал-инструменталдыг ансамбльдың солизи Ачыты Нурзат, “Маадырлар кажан-даа өлбес, олар бистиң чүректеривиске мөңгеде дириг чоруур” — деп чугаалааш, маадырларга хүндүткелин илередип, чон аразында билдингир болу берген ырларын бадырып берген.

#Шынсолун #Тыва #Tuva