Май 8-те Таңдының Межегей ортумак школазынга “Маадырның партазы” болгаш тураскаал бижиктиг самбыра ажыдыышкыны болган. Ону ук школаның доозукчулары, ТШО-га киришкеш, маадырлыы-биле бажын салган Айдыс Монгушевич Ондар, Хүлер Хаяевич Уванзай, Айыжы Алексеевич Оюннуң чырык адын мөңгежидери-биле эрттирген.
Төрээн чуртунуң мурнунга берген даңгыраанга төнчүзүнге чедир шынчы болуп, шериг хүлээлгезин эчизинге чедир сыныш чок күүсеткеш, бажын салган маадыр оолдарга тураскааткан шугум чыскаалынга оларның ада-иези, өг-бүлези, чоок төрелдери, чаңгыс классчылары, башкылары, кады шериг албанын эрттирип чораан эштери болгаш кожууннуң Төлээлекчилер хуралының секретары А.С. Намчак-оол, Өөредилге эргелелиниң даргазы А.А. Чамбал, Таңдының Чонну ажылга тургузар төптүң директору У.М. Нурзат, Межегейниң ТХ баштыңы О.Ч. Мунзук, Межегейниң суму даргазы С.К. Ооржак киришкен.
“Маадырның партазы”- өөреникчиниң кичээлдээр партазы. Ында ук школаның доозукчузунуң чуруун, допчу намдарын, ТШО-га ыдыктыг хүлээлгезин күүседип чорааш, кылган маадырлыг чоруун допчузу-биле бижээн. Ындыг парта артынга чүгле тергиин өөредилгелиг, сагылга-чурумнуг, үлегерлиг сургуулдар, маадырларның уруг-дарыы олурар эргелиг.
Болган хемчегге Межегей школазының маадыр доозукчуларының дугайында оларның башкылары болгаш кады шериг албанын эрттирип чораан эштери бо оолдарның эрес-дидим, чажындан тура салган сорулгазын чедип алыр дээнде быжыг тура-соруктуунуң дугайында болгаш өске-даа эки сактыышкыннарны чыылганнарга чугаалап берген.
Ол-ла хүн маадырларның адын мөңгежиткен парталар салырындан аңгыда, Төрээн чурту дээш тынын берген Айдыс Монгушевич, Хүлер Хаяевич, Айыжы Алексеевичиге тураскаал бижиктиг самбыра ажыдыышкынынга тураскааткан митинги база болган. Аңаа кажыыдалдың минутазын чарлааш, маадырларның самбыразынга боодал чечектер салыр ёзулал-биле хемчег доозулган.
Межегейниң маадыр оолдарынга Эрес-дидим чорук дээш орденнерни мөчээн соонда тывыскан.