Маадырның чырык адынга…

Май 11-ниң хүнүнде Сүт-Хөл кожууннуң Кызыл-Тайга сумузунга тускай шериг операциязының киржикчизи, 55-ки гвардейжи мото-адыгжы (даг) бригаданың 3-кү батальонунуң 9 дугаар ротазының взвод командири, Сүт-Хөл кожууннуң Начын мөгези, лейтенант Ай-оол Моңгуштуң чырык адынга тураскааткан сактыышкын самбыразын төрээн школазы – Кызыл-Тайга ортумак школазынга азар байырлыг хемчег болган.

Байырлыг шугум чыскаалының соонда, 18 харлыг мөгелер аразынга республика чергелиг тыва хүреш маргылдаазы болган. Маргылдаа кончуг бедик деңнелге эрткен. Тываның аңгы-аңгы булуңнарындан ниитизи-биле 34 шыырак мөге күжүн шенешкен. Сүт-Хөл кожууннуң спорт школазының тренери, РФ-тиң спорт мастери аттың эдилекчизи Семен Ондар кол судьялаан, а секретарьның чымыштыг ажылын ол-ла спортчу школаның тренери Вячеслав Тюлюш күүсеткен.

Ай-оол Владимировичиниң эштери Арсен Ондар, Айдың Дун, Эртине-Батор Ондар олар башкарыкчылаан. Мөге салыкчыларының ролюн кожууннуң спорт школазының тренерлери күүсеткен.

Аныяк мөгелерниң ачыр-дачыр тудушканының түңнелинде, Эрзин кожууннуң төлээзи Сүгдер Намчаа шүглүп үнгеш, мотоцикл болгаш 25 муң рубль база кубок, кожаа, медаль шаңналды алган. Барыын-Хемчиктиң мөгези Алаш Моңгуш үжүүрлешкеш, соодукчуну болгаш 20 муң рубль акша шаңналын алган. Үшкү черни Сүт-Хөлдүң аныяк мөгези Айрат Ооржак алгаш, соодукчу ларьны болгаш 15 муң рубль-биле шаңнаткан.

1–8 дугаар чер алган мөгелерге шаңналдардан аңгыда, Кызылдан Красноярск четкеш кээр, автобус билединиң сертификаттарын тывыскан.

Дараазында «Чараш девиг», «Тиилелгеже чүткүл», «Эң-не аныяк мөге», «Бир дугаар октаткан мөге», «Кызымак хүрежи дээш», «Бир дугаар бүрүткеткен мөге», «Эң-не ырак черден келген мөге», «Келир үениң бүзүрели» деп тывызыксыг аттарны аныяк мөгелерге организакчылар тывыскан.

Ай-оол Монгуштуң оглу Шаанакка ачазының эштери Белек, Байыр Ондарлар богбаны белекке берген.

Бистиң корр.
Чуруктарны интернет четкизинден алган.

«Шын» №35 2024 чылдың май 15