Россияның күрүне эрге-ажыын камгалап, Украинада шериг операциязынга киржип тура, аар балыгладып, инвалид апарган Чеди-Хөл кожууннуң чурттакчызының күрүнеден социал төлевирлери кызырылган. Ооң дугайында билдириишкинни тускай шериг операциязының киржикчизи прокуратура органнарынче киирген.
Ооң билдириишкинин прокуратура ажылдакчылары сайгарып көөрге, Чеди-Хөл кожууннуң төп эмнелгезиниң ажылдакчылары боттарының профессионал хүлээлгелерин чогуур деңнелге күүседип шыдаваанындан инвалидтиң төлевирлери кызырылган болган. Тускай шериг операциязының киржикчизи шинчидип турган бо эмнелгениң ажылдакчылары инвалидтиң кадыының байдалын бадыткаан чугула документилерни республиканың медицина-социал экспертиза бюрозунче хоойлу ёзугаар доктааткан хуусаада чорутпаанындан инвалидтиң күрүнеден социал төлевирниң хемчээли кызырылган.
Албан черлериниң ажылдакчылары боттарының албан-хүлээлгелерин чогуур деңнелге күүседип шыдаваанындан, оларның чамдыызының профессионал деңнелиниң кудузундан хамаатыларның күрүнеден магадылаан эрге-ажыктары хажыттына бээр таварылгалар бар. Чөптүг чорукту хамаатылар прокуратора органнарының киржилгези-биле чедип алыр ужурга таваржып турар.
Ш. Лопсан прокуратура органнарының ажык медээлеринден белеткээн.
«Шын №31 2025 чылдың август 14