Беш ажы-төлүнүң иези, сес ачының энерелдиг кырган-авазы, күш-ажылдың хоочуну Кызыл-Уруг Доңгаковна Санчат-оол аныяандан-на уран талантылыг, улустуң ырларын онзагай, тааланчыг күүседир кижи. Школа-интернатка поварлап чорааш, хүндүлүг дыштанылгаже үнгеш, хой-мал өстүрүп ажылдаан. Уруг-дарыын эртем-билигге чедирип, өглеп-баштап, бут кырынга тургузуп каан буянныг өгбе. Чажыды Борис Санчат-оол-биле өгленгеш, 53 чыл эгин-кожа демнежип чурттап чоруурлар. Ажыл-ишчи, кежээ Кызыл-Уруг Доңгаковна аныяктарга мындыг чагыг-сүмезин шүлүк аяны-биле бижип, кыйгырган.
МАЛЫҢАРДАН САЛДЫНМАҢАР!
Узар сугнуң унун дургаар
Улуг ак-ак өглер турлар.
Угбашкылар уруг-дарыы
Улуг чуртун ээлеп арткан.
Кара-Сугнуң кадыр ийде
Хаак, талдар чараш-ла-дыр.
Каттышкылар оолдары
Кадат хоюн дозуп чорлар.
Ол-дур харын, кончуг шын-дыр,
Оон артык кежик турбас.
Малыңардан туттунуңар,
Магалыг-ла чурттаар силер.
Дайын-чааның кончуун көргер,
Даажы дендеп, соксавайн тур.
Даштын малың бар-ла болза,
Дадай дивес, түревес сен.
Даттыг демир аштаттынмас —
Дайын уржуу оон-даа дора…
Малыңардан салдынмаңар,
Бажын ажыр өстүрүңер!
Эрес-кежээ малчынназа,
Эктиң бедик чоргаар болур.
“Шын” № 23 2024 чылдың март 27