Тывада фронтуже гуманитарлыг дуза акциязы уламчылавышаан. Бо удаада республикада Онза байдалдар яамызының камгалакчылары, Тываның гуманитарлыг социал-экономиктиг тускай шинчилелдер институдунуң ажылдакчылары болгаш Роскомхайгаарал специалистери ачы-дуза акциязынга киришкен.
Апрель 22-де Тывада Улусчу фронтунуң салбырынче ОБЯ-ның камгалакчылары ачы-дуза чыылдазынга үлүг-хуузун киирери-биле дөрт генераторну эккелгеннер. Камгалакчылар боттары кадыг-берге байдалдарда ажылдап чоруур болгаш, ТШО-да дайынчыларга доктаамал дузалажып турарлар. Улуг Тиилелгениң 80 чылынга тураскааткан гуманитарлыг дузага киржир сорулганы шагда-ла салган. Шынарлыг дөрт электри генераторун садар деп шиитпирни шупту бир дем-биле хүлээп алганнар.
“Бистиң дайынчыларывыс кижи амыдыраар арга чок байдалдарда чурттап турар болгай. Электри генераторлары чугула херек. Олар чылыг-биле-даа, чырык-биле-даа хандыртынар аргаларын ооң дузазы-биле тып алырлар. Ылаңгыя мурнуку одуругда эрес-дидим эзирлеривиске херек. Сеткиливис ханызындан бо чыылдага кириштивис. Ырак-узак черде дайынчыларывыска бистиң дузавыс болур ыйнаан. Өске чыылдаларга база ам-даа киржир бис” — деп, Тывада ОБЯ-ның дилеп-тывар отрядының камгалакчызы Шолбан Байкара үлешкен.
Инверторлуг генераторну Роскомхайгаарал ажылдакчылары дамчыткан. Ук херекселдиң фронтуга ажык-дузазы улуг. Чүге дизе кандыг-даа дааш үндүрбес, ол ышкаш хемчээли биче болгаш аай-дедир сөөртүрү эптиг.
“Бис удаа-дараа ачы-дуза чыылдазынга киржип турар бис. Чаа чыл санында чигирзиг белектерни Тывадан оолдарывыска сөңнээр улус бис. Оон аңгыда, чылыг хептер, аъш-чемни база каш-даа чоруттувус. Автопоезд колонназынга “УАЗ Патриот” автомашинаны база бердивис. Ам дааш-шимээн чок генераторну садар деп шиитпирлээнивис бо. Маадыр оолдарывыс Тиилелге хүнү таварыштыр бистиң белээвиске өөрүүр боор” — деп, Кызылда Роскомхайгаарал эргелелиниң начальниги Руслан Моңгуш үзел-бодалы-биле үлешкен.
Ачы-дуза акциязынга Тываның гуманитарлыг социал-экономиктиг тускай шинчилелдер институдунуң ажылдакчылары база ачы-хавыяазын кииргеннер. Олар камгаланыр четкилерни эккеп берген. Ол четкилерни ТГШИ-ниң шупту ажылдакчылары ээлчежип тургаш өрүп доозупканнар.
Буянныг акцияга “Алдан” клиниказының ажылдакчылары база киришкен. Олар 2400 балыг шарыыр пөстер болгаш оон-даа өске эм-дом-биле дузалааннар. “Даараныкчылар тиилелге дээш” деп пунктунуң "алдын" холдуг волонтёрлары балыгланган дайынчыларны үндүр сөөртүр херекселдерни даарааннар. Оон аңгыда, шык эрттирбес олуруп-даа, удуп-даа болур херекселдерни база даарап белеткээннер. Тываның күрүне университеди инверторлуг генератор болгаш бензин-биле ажылдаар хирээлерни эккелген. Амгы үеде ТШО-да ук дээди өөредилге чериниң 200 студентизи киржип турарлар.
Чыылдага киржир күзелдиг эриг баарлыг кижилер апрель 28-ке чедир гуманитарлыг дузаны Улусчу фронтунуң Тывада салбырынче эккеп болур.
“Апрель 28-ке чедир чыылда болур, 30-де Тывадан чүък машиналары халдып үнүптерлер. Май 9-та бистиң дайынчыларывыс бо гуманитарлыг дузаны тылда чонундан белек кылдыр алыр боор” — деп, Улусчу фронтунуң Тывада салбырының координатору Даяна Тажи тайылбырлаан.
Олча ОНДАР.
Буян Ооржактың тырттырган чуруктары.
«Шын» №15 2025 чылдың апрель 24