Чурттуӊ эӊ-не улуг назынныг өгбелериниӊ бирээзи – хүндүткелдиг эне Чалапаа Опайевна Оюн.
Күш-ажылдыӊ хоочунунуӊ 101 харлаан хүнүнде, декабрь 17-де, Хову-Аксыныӊ интернадынга байырлал эрттирген.
Эрге-чагырга черлериниӊ өмүнээзинден республиканыӊ күш-ажыл болгаш социал политика сайыдыныӊ оралакчызы Орланмай Куулар байыр чедирген.
«Амыдыралды өскертипкен дыка хөй төөгүлүг болуушкуннарныӊ херечизи, киржикчизи болуп, ажыл-амыдыралды хөгжүдүп, төлептиг чурттап келдиӊер. Эки чүүлдерни өөрүшкү-биле сактып, чугаалап, сагыш-сеткилиӊер кезээде амыр-дыштыг болурун күзедивис. Эӊ-не кол чүүл — кадыкшылыӊар быжыг болзун!» — деп чылыг йөрээл сөстү дамчыткан.
Чеди-Хөлдүӊ «Таӊды-Уула» Культура бажыӊыныӊ артистери, уран чүүл школазыныӊ өөреникчилери чараш аялгалыг ырыларны, танцы-самны күүседип, ёзулуг хөгжүмнүг байырны бараалгаткан.
Улуг өгбе Чалапаа Опайевна бодунуӊ төөгүзүн сактып чугаалаар: «Тыва Арат Республика үезинде ыяш күске чылында төрүттүнген мен. Ынчан ада-ием Таӊдыныӊ Суглуг-Хем деп черге чурттап турган. Ол чер ам Таӊдыда эвес, а Кызыл кожуунга хамааржыр апарган.
Бүгү Тываныӊ чонунга паспорт кылып турар үеде төрүттүнген ай-хүнүмнү, Европаныӊ чыл санаашкыны-биле 1923 чылдыӊ декабрь 17-де деп документиде ынчаар бижээн.
Хөй ажы-төлдүг өг-бүлениӊ дөрт дугаар уруу мен. Кады төрээннерим шупту 13 кижи.
Ада-чурттуӊ Улуг дайыныныӊ чылдарында өөр-өнер чонум-биле кады фрондуга ачы-дуза чедирер дээш, кызып турдувус. Фронтуже чорудар дээш, эш-өөрүм-биле катай эм үнүштер, кат-чимис чыып, алгы-кештен чылыг идик-хеп даарап турдувус. Дайын соонда баштай Сталин аттыг колхозка, ооӊ соонда «Коммунизм херели» деп совхозка мал ажыл-агыйынга ажылдап турдум».
Күш-ажылдыӊ хоочуну Чалапаа Опайевна бүгү назынында чымыштыг ажыл-ижин ак сеткилдии-биле күүседип, бүдүрүлгениӊ мурнакчы ажылчыны деп хүндүлүг атты төлептии-биле эдилеп келген. Ол 1995 чылда хүндүлүг дыштанылгаже үнген, 1997 чылдан бээр Хову-Аксыныӊ улуг назылыг болгаш инвалид улус интернадында чурттап турар.
Р. ДЕМЧИК очулдурган.
“Шын” № 98 2024 чылдың декабрь 21