Бо чылгы кыш улуг харлыг болганы-биле Эрзин кожууннуң чагырга чериниң ажылдакчылары малчыннарже үнүүшкүннерни кылып турар. Март айның эгезинде база кожууннуң чагырга даргазы биле Мөрен суурнуң чагырыкчызы малчын аалдарга четкеннер. «Хар улуг-даа болза, малывысты хүр-менди кыш ажырар дээш, кызып-ла ажылдап тур бис» – деп, малчыннар чугаалааннар.
Даргалар улаштыр Мөрен суурнуң 80 хар ашкан хоочуннары-биле база ужурашкан. Сайлык Даниловна Кенден 83 харлыг, Саяна Кыргысовна Хүдер 82-лиг, Мария Николаевна Чанчыыдай 83 харлыг. Мөрен суурда 80 хардан өрү назынныг 11 хоочун бар бис. Оларның кадык-деңгели эки. Оларның аразында эрес-кежээ, талантылыг-даа кырганнарывыс бар. Чижээлээрге, 85 харлыг Ямаа Кыргысовна Сараагай чыжыргана быжып эгелээрге-ле, арга кирип чыжырганалаар чаңчылдыг.
Малчыннарны, улуг назынныг хоочуннарны үргүлчү тегерип, карактап чорууру дээш кожууннуң болгаш сумунуң чагырга даргаларынга өөрүп четтирер-дир бис.
Чечекмаа САДИ.
Мөрен суур, Эрзин кожуун.
“Шын” №21 2024 чылдың март 20