Республиканың Көдээ ажыл-агый яамызының медээлери-биле алырга, кыштаглаашкын эки байдалда эртип турар. Кыштың февраль айында болгаш март айның эгезинде агаар дүне сооп, хүндүс соок сырын хап турза-даа, малдың сырыңгы аарыглардан аараан таварылгалары демдеглеттинмээн. Ящур, сибирь язвазы дээш мал-маганның өске-даа халдавырлыг аарыгларынга удур тарыышкын ажылдарын мал эмчилери баш бурунгаар бедик деңнелге (162 хуу) чорутканындан ындыг чогумчалыг байдал тургустунган.
Малчыннарның 3423 кыштагларында малдың баш саны кызырылбаан. Малга бээр сигенниң четчир курлавыры кыштагларда бар. Эрткен кыжын харның чагганы дыка кылын эвес болгаш, мал-маганны малчыннар одарладып кадарар арга турган, ынчангаш мал чеми камналгалыг болган. Кыштаглаашкынга белеткээн 223,9 муң тонна мал чеминиң 93,4 муң тонна сиген кыштагларда бар. Ону март, апрель айларда деңгели кошкай бээр хире мал-маганга немелде чем кылдыр бээр.
Хар эрип эгелээн үеде кыштагларже оруктар аштаарынга ажыглаар 97 санныг техника аймаа белен. Кыштагларның 77 хуузу суг-биле доктаамал хандыртынган, арткан кыштагларга сугну доскаарларлыг 33 машина аппарып кудуп турар.
Көдээ ажыл-агый яамызының болгаш кожууннарның чагыргаларының көдээ ажыл-агый килдистериниң мал талазы-биле тускай эртемниглеринден болгаш өске-даа ажылдакчылардан тургустунган бөлүктер малчын коданнарже үнүүшкүннерни кылып, ниитизи-биле 2627 мал кыштагларынга чедип, херек апарганда, херек дузаны чедирип турар.
Бистиң корр.
Чурукту интернет четкизинден хоолгалаан.
“Шын” №9 2026 чылдың март 12