«Малышоктуң» бирги ээлчээ. / Уругларның чайгы дыштанылгазы.

Балгазынның ортумак школазының өөреникчилери ийи дугаар чыл Тываның Агроүлетпүр техникумунуң баазазында өөренип турар (2020 чылдың чазын школаның оран-савазын эргижирээн айыылдыг деп санаан). 2021–2022 өөредилге чылын база техникумнуң сургуулдары-биле ээлчежип доосканнар. Чаңгыс оран-савага өөредилге чорудуу кызыгаарлыг эрткен-даа болза, башкылар программа, план езугаар чогуур ажылдарны чорудуп турар.
Уругларның чайгы дыштанылгазын долу организастаары-биле, «Малышок» школа чанының лагерин ол-ла техникумнуң бир оран-савазынга ажыткан. Бо чылын «Малышокка» Балгазынның уруглары ийи ээлчегге дыштаныр.
Бирги ээлчегде 1-ден 7 класска чедир өөреникчилер – 55 уруг дыштанып турар. Оларның кижизидикчи башкылары Меңги Михайловна Тюлюш биле Айлана Викторовна Монгуш кайызы-даа Балгазын школазының аныяк башкылары. Олар уругларга өөредиглиг, ажыктыг, солун программаны тургузуп алганнар.
Бир ээлчег – 21 хонук дургузунда уруглар янзы-бүрү солун хемчеглерге киржип, хүнде 3 катап чемненип, эш-өөрү-биле ойнап-хөглеп алганнар. Эң-не солун болган мөөрей – «Мисс лагеря – 2022». Бирги ээлчегниң эң-не талантылыг, идепкейлиг болгаш эң-не дидим кыстары бо мөөрейге киришкен. Олар чогаадыкчы салым-чаяанныын, авааңгыр-кашпагайын, угаангырын көргүзер мөөрейлерге шуптузунга идепкейин көргүскеннер. Түңнелинде, «Мисс лагеря» деп дээди шаңналды Тая-Чечээ Чайзатмаа алган. Ийиги, үшкү черлерге Аюша Тюлюш биле Антонина Тукуреева шылгараан.
Ада-чурттуң Улуг дайынының эгелээн хүнү – июнь 22-де Бүгү-российжи «Сактыышкынның чулазы» акцияга каттыжып, Балгазында дайынның маадырларынга тураскаалга лагерьниң уруглары чулаларны кывысканнар. Ол ышкаш «Сери кырында аист» деп патриотчу акцияга тайбың темазынга чуруктар чураан. Спортчу маргылдаалар база болгулаан. Оолдар аразынга тыва хүрешти, уругларга сумо хүрежин эрттирген. Эң-не күштүг кашпагай оолдар, кыстар аразынга адаан-хүреш дыка солун, каткы-хөглүг эрткен.
Каш-ла хонгаш, бирги ээлчег доостур. Уруглар бир ээлчег дургузунда дыка хөй ажыктыг чүүлдерге өөренип, дыштаныр үезин шын ажыглап, уттундурбас солун кылдыр эрттиргеннер.
А. Соян.