Бо чылын 23 дугаар эртер «Мээң чуртум – мээң Россиям» деп бүгү-россия чергелиг мөөрей боттарының хоорай-суурларын хөгжүдер сорулгалыг идепкейлиг российжилерни база катап эвилелдээр. «Аныяктар болгаш уруглар» национал төлевилелдиң бир кезээ болур «Россия – арга-шинектер чурту» федералдыг төлевилелдиң мөөрейи Президентиниң гранты фондузунуң деткимчези-биле эртер.
Чаа сезонда мөөрей соонуң деткимче программазын калбартып, регионалдыг инициативаларга эксперт деткимчезин күштелдирер. Россияның чоннарының чаңгыс деминиң чылынга тураскааткан «Мээң чуртум чоннарының демнежилгези» номинация – бо чылда мөөрейниң кол угланыышкыны.
Мөөрей ийи кол угланыышкынга болуп эртер: 14-тен 17 харга чедир база 18-тен 35 харга чедир киржикчилерге. Ол ышкаш 13 харга чедир уругларга «Чуртум чоннарының тоолдары» деп тускай номинацияны тургускан. «Мээң педагогиктиг инициативам» болгаш «Мээң өг-бүлем: салгалдары, ыдык чүүлдери болгаш ужур-утказы» деп номинацияларның киржикчилерге назы-харда кызыгаарлаашкын чок.
Бо сезонда өөредилге болгаш эртемниң хөгжүлдезинден эгелээш, сан-чурагайжыдылга, сайгарлыкчы чорук, туризм, экология, кадык камгалал болгаш девискээр хөгжүлдезинге чедир янзы-бүрү адырларны хаара туткан шупту 12 номинация бар. Ында «Мээң чуртум чоннарының демнежилгези», «Мээң өг-бүлем: салгалдары, ыдык чүүлдери болгаш ужур-утказы», «Мээң педагогиктиг инициативам», «Мээң кадыкшылым», «Мээң чуртумнуң экологиязы», «Мээң хүндүлээчел Россиям», «Чуртумнуң интеллектуалдыг өнчүзү», «Регионнарда хамаатыларның амыдыралының шынарын бедидер сан-чурагайлыг хүрээлел», «Чуртумнуң эртем-технологтуг тергиидели», «Мээң сайгарлыкчы эгелээшкиним» болгаш «Төрээн черим. Мээң хоорайым, мээң суурум» номинациялар кирген.
2026 чылдың күзүнде шаңнал-макталдар тыпсыр езулал болуп эртер. Финалче кирген болгаш тиилээн инициативаларга мөөрей ынчаар төнмес: финалдың киржикчизи «Мээң чуртум – мээң Россиям» деп мөөрейниң доозукчулар ассоциациязынче кирип, автор инициативаларының төлевилелдер болгаш профессионал өзүлдезин деткииринче угланган өөредилге, эксперт болгаш коммуникативтиг хемчеглер системазынга мөөрей түңнелиниң үделге программазын алыр аргалыг.
«Мээң педагогиктиг эгелээшкиним» бөлүкте киржикчилер 2026 чылда Башкылар хүнүнге тураскааткан IV бүгү-российжи педагогиктиг номчулгаларга база мөөрейлежир.
Программаның база бир кол болуушкуну – «Мээң чуртум. Мээң чоргааралым. Мээң төрээн черим» деп аныяктар шуулганы. Шуулганга мөөрейниң финалистери болгаш тиилекчилери, университеттер, эртем болгаш эксперт ниитилелдерниң төлээлери киржир. Аңаа төлевилелдерни элээн ажылдап кылырынче, регионнар болгаш дээди өөредилге черлериниң аразында харылзааларны хөгжүдеринче кичээнгейни углаар.
Бирги назы-хар категориязының тиилекчилеринге – 14-17 харлыг аныяк-өскенге аңгы программа планнаттынган. 2026 чылдың октябрьда Владивостокта «Океан» бүгү-российжи уруглар төвүнге «Мээң чуртум – мээң Россиям» деп эртемнер аайы-биле төлевилел школазынга өөредилге болуп эртер. Киржикчилер өөредилге программаларынга киржип, дагдыныкчылар-биле ажылдап, мөөрей инициативаларын улам сайзырадыр арганы алыр.
Мөөрейге киржир дизе, май 31-ге чедир moyastrana.ru сайтыга төлевилелдериңерни киирип болур силер. Июнь 1-ден 15-ке чедир мөөрейниң эксперт ниитилели финалче үнер 300 шыырак төлевилелдерни шилип, илередир. Июнь 16-дан август 31-ге чедир түңнелче кирген ажылдар боттарының инициативаларын онлайн-хевирге таныштырып, мөөрейниң эксперттер мурнунга камгалаар.