60 маадырларның тура халыышкынының 140 чыл оюнга уткуштур Алдан-Маадыр суурда тудуг, септелгелиг чаартылгалардан аңгыда, эвээш эвес өске хемчеглер, республика чергелиг эртем-практиктиг конференциялар, семинарлар, мөөрейлер эртип турар. Чижээ, “Мээң өгбелерим – маадырлар” деп эртем-практиктиг конференция О.А. Түмен-Баир аттыг Алдан-Маадыр ортумак школазының базазынга бедик деңнелге эрткен.
Кандыг-даа ажылды кылырда, аңаа белеткел херек. Септеп, чаарткан соонда, кайыын-даа келген аалчыларны школа хүлээп алырынга кезээде белен. Ооң ишти-дашты арыг-силиг, темага дүүштүр дерээни келген аалчыларның сеткил-хөөнүн, хей-аъдын улам көдүрүп турганы билдингир.
Конференцияның ажыл-чорудулгазынга өөредилге килдизиниң кол специализи Лидия Ондар болгаш килдистиң ажылдакчылары, кожууннуң школаларынга чурт-шинчилел ажылының талазы-биле эки чедиишкиннерлиг ажылдап чораан күш-ажылдың хоочуну, хөй шаңнал-макталдың эдилекчизи, дуржулгалыг башкы Зинаида Ховалыг киришкен. Конференция киржикчилеринге школаның 6-гы клазының өөреникчилери В.Ш. Көк-оолдуң “Самбажык” деп шиизинден үзүндүнү ойнап көргүскен. Чоокта сценага үнүп көрбээн шии үзүндүзүн чыылганнар изиг адыш часкаашкыннары-биле үнелеп сонуургааннар. Ол ышкаш С.А. Сарыг-оолдуң “Алдан-Маадыр” деп шүлүүн дыңнааш, сургуулдарның “Алдан-Маадырлар” деп танцы-самын, башкыларның оркестриниң оюн-көргүзүүн көргеш, киржикчилер кайы-бир маадырны караанга чуруп, төөгүнү улам сактып бодап олурганы чадавас.
Школаның өөреникчилери болган конференцияга ийи бөлүкке үстүп алгаш, илеткелдерни кылган, “Мээң ук-ызыгуурум – алдан-маадыржылар” деп бирги бөлүкке беш өөреникчи илеткелди номчаан. Түңнелинде, Алдан-Маадыр школазының 10-гу классчызы Алдынай Монгуш (удуртукчузу Урана Ховалыг – социал педагог) “Шожапайның салгалы мен” деп илеткелди номчааш, 1-ги черге төлептиг болган. 2-ги черни “Өгбелерим шола аттары” деп илеткели-биле ол-ла школаның 10-гу классчызы Адын-Сай Монгуш (удуртукчузу Зоя Ондар – тыва дыл, чогаал башкызы) ээлээн. “Садыяажыктың салгалы” деп бөлүкке 3-кү черни 10-гу классчы Арияна Куулар (удуртукчузу Аяна Куулар – география башкызы) алган.
“Алдан-маадыржыларның алдар адын мөңгежиткени” деп ийиги бөлүкке 1-ги черни Алдан-Маадыр школазының 10-гу классчызы Орланмаа Ондар (удуртукчузу Надежда Ооржак- физика болгаш сан башкызы), 2-ги черни 9-ку классчы Хорагай Ооржак (удуртукчузу Елена Ооржак – төөгү башкызы) алган. Ол ышкаш 2-ги черни Ак-Даш школазының 10-гу классчызы Сарыг-оол Мартаа (удуртукчузу Римма Ооржак – сан башкызы) “Монгуш Оттуккайның салгалдары” деп илеткели дээш база-ла 2-ги черни Алдан-Маадыр школазының 9-ку клазының өөреникчизи Сайын-Белек Куулар (удуртукчузу Солаңгы Донгак – школада музей эргелекчизи) “Алдан-маадыржыларның эрес-дидим баштыңчызы – Самбажык” деп илеткелди номчааш, алганнар.
Конференциядан уруглар боттарының ук-салгалын, улуг өгбелерин танып билип алганнар. Моон соңгаар мындыг чижектиг конференцияларны хөйү-биле эрттирери күзенчиг. 60 маадырларның тура халыышкынының 140 чылынга тураскааткан кожуун чергелиг конференция өгблерниң чуртунга бедик деңнелге эрткенин демдеглевес аргажок.
Зоя МОНГУШ.
ТР-ниң өөредилгезиниң алдарлыг ажылдакчызы, хоочун башкы.
"Шын" №40 2023 чылдың июнь 3