Тыва Республиканың Дээди Хуралының (парламент) соңгулдаларынга “Мобильдиг соңгукчу” деп система ажылдаар. Чогуур дугуржулгага Тыва Республиканың Соңгулда комиссиязының даргазы Лариса Андалаева болгаш “Тыва Республиканың Хөй ажыл-чорудулгалыг төвүнүң” (МФЦ) директору Омак Монгуш атты салганнар.
“Мобильдиг соңгукчу” Кызыл хоорайга, кожууннарда турар, ооң адырларынга “Мээң документилерим” килдиске соңгулда киржикчилеринге дузазын чедирер.
Июль 23-те Тыва Республиканың Соңгулда комиссиязының Аппарадының соңгулда ажыл-чорудулгазын организастаар талазы-биле эргелелдиң даргазы Дозураш Шулуу болгаш Тываның Соңгулда комиссиязының медээлер төвүнүң удуртукчузу Альберт Ховалыг турар чериниң аайы-биле соңгуурунуң дугайында билдириишкиннер хүлээп алыр МФЦ операторларынга өөредилгени чоруткан. Турар чериниң аайы-биле соңгукчулар даңзызынче кирериниң дугайында соңгукчуларның билдириишкиннерин хүлээп алгаш, ажылдап кылырын организастаар чурумну өөренип көрген.
“Мобильдиг соңгукчуну” бүрүткеткен чериниң аайы-биле эвес, а каяа эптигил, аңаа соңгуур күзелдиг кижи бүрүзү ажыглап болур. Ынчаар соңгуур деп бодаар болза, паспортун тудуп алгаш, Хөй ажыл-чорудулгалыг төптүң (МФЦ) кайы-даа адырынга билдириишкинниг чеде бээр.
Билдириишкинни июль 24-тен тура бижип болур. Сентябрь 4-ке чедир хүлээп алыр. Ук билдириишкинни чүгле чаңгыс катап киирип болур.
Оон аңгыда, соңгукчулар кайы-даа соңгулда комиссиязынче ындыг билдириишкинни чедирип болур.
Бистиң корр.
"Шын" №55 2024 чылдың июль 24