Моол болгаш Кыдатче транспорт коридорларының сайзыралының дугайында Владислав Ховалыгның планнарын Россияның федералдыг төптүң талазындан аажок сонуургап, деткип турар. Бо эгелекчи саналдыӊ чугула деткикчилериниң бирээзинге Россия Федерациязының Чазак Даргазының бирги оралакчызы Денис Мантуров хамааржыр болгаш ол Евразияның кады ажылдажылгазының иштинге интеграциялыг болуушкуннуң стратегтиг ужур-дузазын онзалап демдеглеп турар.
Ук түңнелди эксперт-политологтар деткип турар. ТГ-канал политолог (ЦРРП) https://t.me/thegraschenkov регионалдыг политиканы сайзырадыр төптүң президентизи Илья Гращенков федералдыг төптүң талазындан В. Ховалыгның төлевилелинче улуг кичээнгейни салып турарын болгаш ниити национал сорулгаларны боттандырарынга ооң идепкейжи чоруу Тываның Баштыңының Стратегиязы чедимчелиг магадылалы болур деп дыңнаткан. В. Ховалыг дуржулгалыг менеджерниң талазындан Россияны Чөөн чүкче угландырарындан аңгыда, бодунуң регионун сайзырадыр сорулганы боттандырып шыдаар деп эксперттер санап турар.
Амгы үениң байдалынга транспорт инфраструктуразын сайзырадыры Тыва Республиканың болгаш ниити чурттуң экономиказын турум байдалда өзүлдезин хандырар кол угланыышкыннарның бирээзи болур деп демдеглеп тур бис. Ооң-биле чергелештир транспорт коридорун тургузар, чаартыр төлевилелдер делегей ареназынга Россияның туружун быжыглаары, чүгле экономиканы эвес, геополитиканың векторларын тургузары болур. Тываның транспорт маршруттары Сибирьниң болгаш кожа-хелбээ чурттарның логистиктиг херекселдерниң чугула илчирбези болбушаан, садыг-саарылга, экономиктиг кады ажылдажылгага чаа эжикти ажыдары чугаажок.
Чаңчылчаан транзит оруктарны долганыр коридорларны сайзыратканы-биле барааннарның чедирилгезиниң хуусаазы кызырлып, тус регионнуң экономиказының чижилгелиг шыдал-күжүн өстүрер деп, Владислав Ховалыг санап турар. Ол дээрге, иштики бүдүрүкчүлерге немелде таарымчалыг байдалды тургузуп, инвесторларның сонуургалын Тываже хаара тудары болур.
Денис Мантуров төлээлээн федералдыг төп акшаландырыышкындан эгелээш, организастыг болгаш аналитиктиг дузага чедир бүгү талалыг деткимчени көргүзеринге беленин бадыткаан. Транспорт коридорун сайзырадыр эгелекчи санал Тываның эрге-ажыынга дүгжүрүнден аңгыда, Азия чурттары-биле харылзаазын быжыктырып, Россияның ниити стратегиязы-биле дүгжүп турары регионалдыг болгаш федералдыг эрге-чагыргалар аразынга харылзааның бедик болурун херечилеп турар.
Россия, Моол болгаш Кыдатты каттыштырар транспорт оруу Тываның потенциалының талазы-биле янзы-бүрү шуулганнар, бизнес ужуражылгалар үезинде идепкейлиг сайгаржып, чугаалажып турар. Бо хемчеглерниң киржикчилери транспорт инфраструктуразын сайзыратканы-биле регионнуң социал болгаш экономиктиг туружунга таарымчалыг байдалды тургузуп, чаа ажылчын олуттарны немей тургузар, чурттакчы чоннуң амыдыралының байдалын экижидеринге чугула ужур-дузалыг деп санап турар. Мындыг таварылгада, федералдыг эрге-чагырганың деткимчези регионнуң болгаш төптүң каттышкан күжениишкини-биле салдынган эчис сорулгалар чугула үре-түңнелге чедирер ужурлуг.
Николай Иванов
Чуруктарны интернет четкизинден хоолгалаан.