Моолче дорт авиарейс-биле

Красноярск – Улан-Батор аразында үргүлчү ужар рейсти КрасАвиа ажыдып турар. Моол күрүнениң найысылалынче дорт рейстиң авиабилеттерин чоокку үеде садып эгелээр. Орук ара самолет Кызылга база хонуп, моон чоруур пассажирлерни алыр.

Май 24-тен эгелеп Красноярск – Улан-Батор – Красноярск аразында маршрутту доктаамал байдалга күүседип эгелээр.

Расписаниени тургузуп тура, Тыва Республика биле Моолдуң аразында төөгүлүг харылзааларны өөренип көрген. Рейстерниң аразында ыраа дөрт хире шак. Бо маршрутту АTR-42 самолетка күүседир. Красноярск хоорайдан Моолдуң найысылалынче самолет 23:55 шакта ужудуп үнер, орукка чорууру 3 шак 25 минута; Улан-Батордан дедир кээрде, 05:40 шакта ужуп үнер, орукка чорууру 3 шак 30 минута.

Билеттиң өртээ 13 500 рубльден тура. Баштайгы рейс май 24-те болур, ооң соонда расписание езугаар неделя санында.

Улан-Баторнуң аэропортундан Сеул, Токио, Пекин, Гонконг болгаш өске-даа Бүгү-делегей угланыышкыннарынче коштажып ужудары көрдүнген.
«Барык чыл хире үе дургузунда чаа уг-шигни ажыдарының талазы-биле хөй-ле саазыннарны долдуруп, дугуржулга-чөпшээрежилгелерни кылып келдивис – деп, «КрасАвиа» авиакомпанияның чиңгине директорунуң оралакчызы Андрей Егоров тайылбырлап турар – компания IATA деп Бүгү-делегей кодун, үргүлчү ужудар саарылгалыг рейстерни күүседиринге Моолдуң ужар чүүл эрге-чагыргаларының аккредитациязын алган. Бо хүннерде Красноярск – Улан-Батор маршруттуң ужудуушкунун эгелээринге эргежок чугула ажылдар доозулган. Бо болза «КрасАвианың» төөгүзүнде эң-не баштайгы Бүгү-делегей угланыышкыны-дыр, сөөлгүзү эвес деп идегээр апаар».

Чаа авиарейс Красноярск край, Тыва Республика болгаш Моолдуң аразында кады ажылдажылганы улам быжыглаар арганы бээр.
Билеттерни «КрасАвиа» авиакомпанияның албан езузунуң сайтызындан болгаш чурттуң бүгү авиакассаларындан садып ап болур.

#ТываРеспублика #Кызыл #Красноярск #Улан_Батор #КрасАвиа #а\Авиарейстер #Шынсолун