Бо хүннерде Улан-Батор хоорайда XXXV дугаар “Ворота в Азию” Бүгү-делегей чергелиг делгелге болуп турар. Ында Россияның кызыгаарда чыдар регионнары – Забайкалье край, Иркутск облазы, Бурятия болгаш Тыва Республика киржип турар.
Ийи чыл болгаш катап ажылын эгелээн делгелгеже Тывадан делегацияның киржилгезин ТР-ниң Садыг-үлетпүр палатазы организастаан. Ооң удуртукчузу Аяс Мөңгеге баштаткан сайгарлыкчылар болгаш ТР-ниң Сайгарлыкчы чорукту деткиир фондузунуң ажылдакчылары улуг хемчегде киржип турар.
“Моол–Россия кызыгаары коронавирус хамчыктыг аарыгның хайы-биле ийи чыл дургузунда хагдына бээрге, кожа чыдар биске, сайгарлыкчыларга, чамдык нарын байдалдарны тургузуп турган. Ам бо хүнде Улан-Батор хоорайга катап кээп, янзы-бүрү садыг-саарылга ажылын чорудуп турар сайгарлыкчылар, улуг компанияларның бүдүрген барааннарын делгээн хемчегге киржип келгеш, боттарывыска ажыктыг хөй чүүлдерни билип ап тур бис. Бо бизнесс-миссияга киржип келген кол-ла сорулгавыс – Моолдуң сайгарлыкчылары биле бистиң республиканың сйгарлыкчыларының аразында удур-дедир ажыктыг кады ажылдажылганы катап эгелээри болгаш келир үеде кылыр ажылдарны дугуржуп, орулгалыг ажыл чорудар керээлерни чарып алыры. Ол ышкаш туризм талазы-биле айтырыг база бир кол черни ээлеп турар” – деп, Аяс Мөңге дыңнаткан.
К. Монгуш.