Улан-Батор хоорайга болган «Тонж Манлай» национал хүреш маргылдаазынга Тывадан 4 элээди мөге киришкен. Элээди мөгелерниң бирээзи 11 харлыг Лопсан Монгуш 9–10 харлыг оолдар аразынга хүрешкеш, хүлер медальды чаалап алган.
Моол чедир узун орук оларга чүгле тиилелгеже тура-сорукту оттурган дээрзин Лопсан Монгуш чугаалаан: «Улан-Батор хоорайга чедир 3 хонук чоруп келдивис. Мындыг узун орукту эрткеш, шаңнал чок чанмас деп бодап алган бис. Түңнелинде, хүлер медальга төлептиг болдум».
Маргылдаалар соонда Моолдуң сураглыг мөгези Дашдондогийн Цогзол Улан-Баторнуң онзагай чараш черлеринге чедиргеш, бодунуң спортчу клувунче чалаан. Аңаа оолдарга хүрештиң аңгы-аңгы аргаларын көргүзүп, мастер-классты эрттирген.
Элээди спортчунуң чугаазы-биле алырга, ол 8 харлыында бир дугаар хүрешке киришкен. Ынчан ол хүрештиң аргалары болгаш дүрүмнерин эки билбес хирезинде үжүүрлежип каан. Оон эгелээш-ле хүреш спортунга сонуургалы оттуп келген.
Келир үеде кым болуксап турарын Лопсан мынчаар харыылаан: «Ам ол дугайын бодавайн тур мен, ынчалза-даа Күчүтен мөге атты албан чедип алыр сорулгалыг мен».
Бистиң корр.