Морзук

Тоол
Морзук суг ижер деп чорааш, хем кыдыынга Бугага ужуражы бергеш, шоодуп каттырып-ла эгелээн.

– Бо чүү адам, элдептиг, каттырынчыг амытан сен! Бажы калчан, карактары алараңнаар, думчуу шүжүлээн, артында-ла чүзүнү чок. Дүрзү-түрүзүн оскундур семирип алган, сиген тырып каан барба-ла – дээш, чер дырбап, кара баары каткыже каттырып, чуглуп туруп берген.

Буга Морзукту ыыт чок көрүп туруп-туруп:

– Бодун боду билинмес, морзук калчанын билинмес, элдептиин аа – дээш, оруун уламчылап чоруп каап-тыр. “Бодун боду билинмес, морзук калчанын билинмес” – деп үлегер чугаа ам-даа уламчылавышаан.

«Тыва улустуң аас чогаалы — чоннуң сагыш-сеткил өнчүзү» деп чырыдыышкын, эртем-методиктиг сайттан алган.

“Шын” №30 2024 чылдың апрель 20