Тываныӊ Баштыӊы Россияныӊ энергетика сайыды-биле бистиӊ республиканы энергетика-биле хандырар комплекстиг планны боттандырар ажылдар дугайында сайгарып чугаалашкан.
Тываныӊ Баштыӊы Владислав Ховалыг амгы бо үеде республиканыӊ хөгжүлдезиниӊ айтырыгларын федералдыг яамылар-биле сайгарып чугаалажып, ажыл-агыйжы херектер-биле Москва хоорайда чеде берген.
Республиканыӊ удуртукчузу ноябрь 14-те Россияныӊ энергетика сайыды Сергей Цивилев-биле ужурашкаш, бистиӊ регионну энергетика-биле хандырар комплекстиг планныӊ күүселдезин сайгарып турган. Бо чылдыӊ октябрьда болган хуралдыӊ түӊнелдери-биле Россияныӊ Чазааныӊ Даргазыныӊ бирги оралакчызы Денис Мантуровтуӊ берген даалгаларын күүседирде, кады ажылдаар аргаларны база чугаалашкан.
Ол дээрге Кызылга тудуг ажылын хөгжүдери-биле хоорайга күштүг электроэнергия дамчыдар «Эне-Сай» деп подстанция тударыныӊ дугайында даалгалар болур.
«Чедиишкин Тываныӊ, «Россеть» компанияныӊ база федералдыг яамыларныӊ кады кызып ажылдаарындан хамааржыр. Кижи бүрүзүнүӊ туружунуӊ тодаргай болуру чугула. Мөӊгүн-Тайга кожуунга электри дамчыдар шугумну тударыныӊ дугайында айтырыгны база көдүрдүвүс» — деп, Тываныӊ Баштыӊы демдеглээн. Сегей Цивилев ооӊ мурнунда губернатор турган болгаш, ол чугула шиитпирлээр ужурлуг айтырыг деп билип, Тываныӊ Баштыӊыныӊ саналын деткип турар дээрзин Владислав Ховалыг айыткан.
«Регионнуӊ ажыл-агый адырларыныӊ хөгжүлдези ооӊ энергетиктиг күчүзүнден хамааржыр. Бистиӊ компанияларывыска үндүр сөөртүр хөмүрнүӊ хемчээлин хевээр арттырар, ону улгаттырар талазы-биле магадылалдыг демир-орук квоталарыныӊ айтырыын, ооӊ иштинде чурттакчы чонга хөмүрнүӊ чиигелделиг өртээн хевээр арттырып алыр сорулгалыг айтырыгны кады ажылдап кылыр аргалар дугайында чугаалаштывыс» — деп, Владислав Ховалыг түӊнээн.
Р. ДЕМЧИК очулдурган.
Чуруктарны интернет четкизинден алган.
“Шын” №88 2024 чылдың ноябрь 16