Муң ажыг кижи саргыга ызырткан

Эрткен неделя дургузунда саргыга ызырткан улустуң саны 80 четкен. Оларның барык чартыы – назы четпээннер. Тываның Кадык камгалал яамызының дыңнадып турары-биле алырга, 2021 чылдың бо үезинге деңнээрге, 25 хуу хөй болуп турар.
Специалистер саргыларның көвүдеп турарын демдеглеп турар. Чайгы сезон эгезинден тура саргыларның кижиже халдаан таварылгалары 1046 четкен. Оларның 502-зи бичии уругларны ызырган. Бо талазы-биле эмчи пунктуларынче дуза дилеп чедип турар улустуң саны эрткен чылга көөрде, 10,3 хуу көвүдээн.
Ол ышкаш саргыларда халдавырлыг вирус бары база илереттинген. Лабораторияларга 300 саргыны шинчилеп хынаан соонда, беш дугаар саргы бүрүзү айыылдыг инфекцияның дамчыдыкчылары болуп турар. Ынчалдыр 37 саргыда – боррелиоз, 7 саргыда – энцефалит, 12 саргыда – моноцитарлыг эрлихиоз бар болган.
Республиканың чазаа хөй чон чыглыр черлер – уругларның чайгы дыштанылга лагерьлери, парктар, сесерликтер, санаторлуг-курорт девискээрлери, дыштанылга баазалары болгаш өске-даа черлерге катап-катап санитарлыг арыглаашкынны чорударын негеп турар. Ол ышкаш чурттакчы чонну саргыга удур тарыыр ажылды күштелдирери чугула деп сагындырып турар.

Бистиң корр.Чурукту интернет четкизинден алган.