Малчыннарныӊ Наадым байырлалын август 13-те болур дээрзин Тываныӊ Чазаа доктааткан.
Регионалдыг байырлалдарныӊ болур ай-хүнүн чылдыӊ-на республиканыӊ күүсекчи эрге-чагыргазы хоойлуга дүүштүр тодарадып турар. Чоннуӊ байырлалын эрттирер черни сайыттар кабинеди тодараткан. Наадым-2023, ооӊ мурнунда чылдарда ышкаш, Кызылдан ырак эвесте Тос-Булак деп черге болур.
Чоннуӊ байырлалын эрттирер хүнүнде улуг-хүн таваржы бээрге, август 13-тү, дыштаныр хүннү, понедельникче, август 14-че, чылдырар деп шиитпирни доктаалда бижээн.
Август 15-те Тывага Республика хүнүн, тодаргайлаарга, ооӊ тургустунганындан бээр 102 чыл болганын демдеглээрин барымдаалаан, регионнуӊ чурттакчылары август 12-де субботадан тура август 15-ке, вторникке чедир 4 хүн дыштаныр.
Тываныӊ Баштыӊы Владислав Ховалыг Наадым биле Республика хүнүнге белеткенир болгаш оларны эрттирерин харыылап турар яамыларга болгаш ведомстволарга болур-чогуур чугула даалгаларны берген.
Ол даалгалар байырлал хемчеглерин эрттирер шөлдерни чаагайжыдарынга, хоорай аразынга аргыжар автобустарны организастаарынга, хөй чон чыглыр черлерге корум-чурумну болгаш айыыл чок чорукту хандырарынга хамааржыр.
ТР-ниӊ Чазааныӊ медээзи-биле Р.Демчик белеткээн.