Тываның кол национал байырлалдарының бирээзи малчыннар наадымы бо чылын июль 23-тен 25-ке чедир болур. Ол дугайында республиканың Баштыңы Владислав Ховалыг бодунуң МАХ-та каналынга дыңнаткан.
Байырлал хүнүн республиканың Чазак кежигүннериниң болгаш Кызылдың мэриязының кады шиитпири-биле бадылаанын регион удуртукчузу тайылбырлаан. “Байырлал хүннерин душ бооп шиливээн бис – малчыннарның чаңчылчаан амыдыралының байдалынга өөренип таарыштыр көрген бис. Июль төнчүзү дээрге, эң-не чогумчалыг үе-дир. Байырлалды бедик деңнелге көрүштүг кылдыр эрттирген соовуста, мал-маганывыс соок кышты хүр-менди ажып эртери-биле күскү дүжүт ажаалдазы, кышка белеткел ажылдары кидин түлүк эгелээр” — деп, Владислав Ховалыг демдеглээн.
Республиканың Баштыңының чугаазы-биле алырга, бо чылдың хемчеглеринге Тываның чурттакчыларының болгаш аалчыларының ынак национал маргылдаалары: аът чарыжы, ча адары, хүреш шупту болур. Национал байырлал кижи бүрүзүнге уттундурбас болзун дээш, өске-даа солун хемчеглерни белеткеп турарын база демдеглээн.
«Бистиң сорулгавыс – Наадым чүгле хөглээшкин эвес, а кижи бүрүзүнге айыыл чок болур кылдыр чедип алыры. Байырлыг хемчеглер үезинде бүгү-ле ачы-дуза чедирилгениң албаннары ажылдаар, тургускан айыыл чок чоруктуң негелделерин ыяап сагыыр» – деп, Владислав Ховалыг онзалап демдеглээн.
Наадым – Тывада мал ажыл-агыйга хүндүткелди көргүзүп, көшкүн культура чаңчылдарын кадагалап арттырарын, салгалдан салгалче национал үнелиг чүүлдерни дамчыдып турарын илередип турар эң-не кол байырлалдарның бирээзи. Республиканың болгаш чурттуң өске-даа булуңнарындан муң-муң киржикчилер болгаш аалчылар чылдың-на байырлалга кээп турар. Аалчыларның хөй кезии бо үеде Тываже аян-чорук кылып, национал байырлалдың хемчеглерин сонуургап көөрүн планнап турар.
Эрткен чылын Тывага Наадым байырлалы июль 18-тен 20 хүннерде Тос-Булакка болуп эрткенин сагындыраал.
/ Бистиң корр.
Буян ООРЖАКТЫҢ тырттырган чуруу.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...