Тыва чоннуң Наадым байырлалын үш хонук дургузунда байырлап келдивис. Байырлалды чыл келген тудум шынарлыг эрттирип турарын чон эскерип тур боор. Ылаңгыя «Хүреш» стадионунга ажыдыышкынын аажок сонуургап көрдүвүс. Дыка хөй кижи киржикчилиг танцы-самның түрлүүн, чаражын! Бо чылын Тиилелгениң 80 чылдаанынга тураскаадып эрттиргени бир онзагай болду. Тос-Булакка «Кызыл кошту» уйнуктарым-биле көрдүвүс. Олар Ада-чурттуң Улуг дайынынга тыва чон канчаар дузалажып турганын караа-биле көрүп, төөгүнү билип алганнар.
Наадым чылдың-на изиг, кааң хүннерде болур. Бо изиг-чарда ийи-үш хонук дургузунда Тос-Булакта өглерин тиккен, аалчыларын уткуп хүндүлээн малчыннар-даа кээргенчиг-дир. Оларны шаңнап-мактап турарын көргеш кижи өөрүүр, чоргаарланыр. Чымыштыг ажыл-иштиң кижилерин ынчаар хүндүткеп, алдар-ат тыпсып, шаңнап-мактап-ла турзун.
Кандыг-даа байырлалдың чараш талазын карартыр базып каар чүүлдер турары хомуданчыг. Кызыл хоорайның мэриязының медээлерин номчудум, эрткен неделяда эзириктер сергедир черже 1141 кижи кирген, оларның 300-ү херээжен кижилер. Эң-не хөй эзириктерни найысылалдың төвүнден туткан, мырыңай 541 кижи. Республиканың төвүнде эң-не көскү черде эзириктерни чүгле байырлалдар үезинде эвес, үргүлчү хайгааралга ап, хемчээн ап турар болза, ынчан эвээжээр боор.
Мындыг-ла-дыр, байырлалдар чараштыр эртип-ле турар, а корум-чурумувус өскерилбес ол-ла хевээр.
Маадыр-оол МЫНДЫРЯ.
Сукпак суур.
Чурукту Кызыл хоорай мэриязының социал четкиде арнындан алган.
“Шын” №28 2025 чылдың июль 24