Август 24-те Улусчу чогаадылга бажыңынга республика малчыннарының «Наадым – 2026» байырлалынга тураскааткан концерт программалыг байырлыг хурал болуп эрткен. Аңаа Тываның көдээ ажыл-агый адырын сайзырадырынга улуг үлүг-хуузун киириштирип чоруур мурнакчылар: хойжулар, чылгычылар, ивижилер, сарлыкчылар болгаш өске-даа көдээ иштиң шалыпчылары – хүндүлүг аалчылар болуп киришкен.
Бедик көргүзүглери-биле шылгарааннарга Россияның Көдээ ажыл-агый яамызының, Тываның Чазааның, ТР-ниң Дээди Хуралының, ТР-ниң Көдээ ажыл-агый болгаш аъш-чем яамызының шаңналдарын тывыскан. Бирги черге төлептиг болуп, «Наадым чемпиону» атты алган тиилекчилерни бир хүн бурунгаар Тываның Чазаанга болган байырлыг хуралга шаңнап каапкан, а бо хуралга ийиги болгаш үшкү черге төлептиг болган мурнакчыларны, көдээ ажыл-агыйның өске-даа адырларында иженип чоруур маадырларны шаңнаан.
Агроүлетпүр комплекизинге хөй чылдарда ак сеткилдиг ажылы дээш РФ-тиң Көдээ ажыл-агый яамызының Хүндүлел бижии-биле Мөңгүн-Тайга кожууннуң «Сайзырал» көдээ ажыл-агый бүдүрүлге кооперативиниң даргазы Сайлык Конзайовна Кууларны шаңнаан.
Республиканың ветеринария төвүнүң Таңды кожуунда салбырының мал эмчизи Лариса Санчааевна Очур-оолга, Барыын-Хемчик кожуунда салбырының мал эмчизи Олег Хертекович Бопар-оолга РФ-тиң Көдээ ажыл-агый яамызының Өөрүп четтириишкинин илереткен.
Көдээ ажыл-агыйның хөгжүлдезинге киирген үлүг-хуузу болгаш үре-түңнелдиг ажылы дээш Тываның Баштыңының өөрүп четтириишкин бижиктерин Кызыл кожууннуң Сукпак сумузунда арат (тараачын) ажыл-агый баштыңы – хууда сайгарлыкчы Буян Михайлович Монгушка болгаш Чеди-Хөл кожууннуң «Кужур-Бажы» көдээ ажыл-агый бүдүрүлге кооперативиниң даргазы Айлык Геннадиевна Чамыяңга тывыскан.
Тываның көдээ ажыл-агый шугумунга хөй чылдарда ак сеткилдиг ажылы дээш Улуг-Хем кожууннуң Торгалыг сумузунда арат (тараачын) ажыл-агый баштыңы Булат Владимирович Бадыны, Тере-Хөл кожууннуң Эми сумузунда хууда дузалал ажыл-агыйлыг Анна Васильевна Идамны, Тываның көдээ ажыл-агый эртем-шинчилел институдунуң – Россияның эртемнер академиязының агробиотехнологиялар эртем төвүнүң Сибирьде федералдыг салбырының мал чеми бүдүрүлгезиниң болгаш чер ажыл-агый лабораториязының улуг эртем ажылдакчызы Лилия Тангытовна Монгушту, Тере-Хөл кожууннуң Шынаа сумузунда арат (тараачын) ажыл-агый баштыңы Айдомир Артурович Сундуйну, Кызыл кожууннуң Кур-Чер сумузунда хууда дузалал ажыл-агыйлыг Аяс Анатольевич Хомушкуну Тываның Баштыңының хүндүлел бижиктери-биле шаңнаан.
«Тыва Республиканың көдээ ажыл-агыйының алдарлыг ажылдакчызы» хүндүлүг атты Мөңгүн-Тайга кожууннуң «Бай-Белдир» көдээ ажыл-агый бүдүрүлге кооперативиниң даргазы Ачыты Чудурович Салчакка тывыскан.
Улаштыр ТР-ниң Дээди Хуралының Даргазы Каң-оол Даваа көдээ ишчилерге байыр чедирип, шаңналдарны тывыскан. Көдээ ажыл-агый сайыды Юрий Оруспай ийиги болгаш үшкү чергениң мурнакчы малчыннарын шаңнаан.
Байырлыг хуралды «Саяннар» национал хөгжүм болгаш танцы-сам театрының, Виктор Көк-оол аттыг национал хөгжүм-шии театрының артистери, сураглыг ыраажылар, хөөмейжилер, «Тыва» болгаш «Раздолье» ансамбльдери, «Ыраажы малчын–2025» мөөрейниң тиилекчизи Самба Куулар каастааннар.
/ Надежда КУУЛАР.
Буян Ооржактың тырттырган чуруктары.
“Шын” №29 2026 чылдың июль 30
"Шын" солуннуң МАХ-каналынга каттыжыңар: max.ru/channel_shyn