«Түбтен Шедруб Линг» хүрээзиниң баазазында ажыттынган шажынчы университеттиң ректорунга Начын Кунуужапты томуйлаан. Ол ооң мурнунда ректорнуң оралакчызының хүлээлгезин күүседип турган. Начын Кунуужап 32 харлыг. Ооң алыс чурту Эрзин кожууннуң Эрзин сумузу.
Начын Кунуужап Индияның Дрепунг Гомаң хүрээзиниң доозукчузу. 2008 чылдан 2015 чылга чедир өөренгеш, хүрээниң школазынга бир дугаар даштыкы өөреникчи болган. 2011 чылда эң-не тергиин өөреникчи деп үнелелди алган. Ол ышкаш Сарнатх хоорайның Төп буддизм эртемнериниң дээди институдун «ачарья» эртеми-биле дооскан. Ол төвүт дылдан очулдурукчулап ажылдап турар. Оон ыңай санскрит, хинди, англи дылдарны база эки билир.
Россияның сарыг шажын университеди 2025 чылдың күзүнде Кызылдың Түбтен Шедруб Линг хүрээзинге Россияның буддистер ассамблеязының эгелээшкини-биле база Күжүгет Шойгу аттыг культура фондузунуң деткимчези-биле ажыттынган. Өөредилге ажыл-чорудулгазынга лицензияны 2025 чылдың август 8-те алган. Байырлыг ажыдыышкыны октябрь 23-те В. Көк-оол аттыг национал хөгжүм-шии театрынга болган.
Университетте үш программа ажылдап турар. Ол дээрге буддийжи философия, сарыг шажын медициназы, буддийжи уран чүүл. Өөредилге программазында төвүт дыл болгаш классиктиг сөзүглелдерни студентилер албан өөренир, ыяк билген турар ужурлуг. Сургуулдарның бирги бөлүү өөредилгезиниң эге чадазын дооскан. Бир-ле дугаарында өөренип кирген 27 чаңгыс курсчуларның 24-ү шылгалдаларны чедиишкинниг дужаап, дараазында өөредилге чылынче азы ийиги курсче шилчээн.
Университеттиң планынче өөредилге программазын ам-даа калбартыры кирип турар.
/ Бистиң корр.
Чурукту «Шын» солуннуң архивинден алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn