"Сүбедей" спорт ордузунга ноябрь 30-де дайынчы мөгевис Начын мөге Айбек Даш-Шиви мугур 40 харлаан байырлалы таварыштыр “Начын мөгениң найыры” деп улуг мөгелер аразынга тыва хүреш маргылдаазы болуп эрткен.
Маргылдаага ниитизи-биле 66 шыырак мөге ачыр-дачыр тутчуп, чараш хүрешти көргүскеннер. Байырлыг найыр маргылдаазын мөге боду база Сүт-Хөл кожууннуң мөгелери, хөгжүмчүлери, кожуун баштыңы – Чаан мөге Андрей Хертек удуртуп эрттиргеннер.
Маргылдаага Моолдуң Авырга мөгези, Тыва Республиканың алдарлыг ажылдакчызы Дамиран Бумбаяр хүндүлүг аалчы болуп келгени улуг хүндүткел болган. Бо аалчы Моол күрүнениң Шонхор хүреш школазының удуртукчузу, ол ышкаш Андрей Хертек, Эрес Кара-Сал база оон-даа өске тыва мөгелерниң улуг башкызы болур.
Начын мөге Айбек Даш-Шиви 2003 чылда Наадымга аныяктар аразынга 3-кү черни, 2008 чылдың Наадымынга шыырак мөгелер аразынга 8-ки черже кирип, Начын мөге деп атка төлептиг болган. Дайынчы самбога 2009 чылда Европаның чемпиону, 2009 чылда делегей чемпионадынга хүлер медальдың эдилекчизи, 2016 чылда Сибирь девискээриниң ММА чемпиону, 2016 чылда Алтай Республиканың “Эл-Ойын” байырлалынга алтай хүрештиң тиилекчизи. Делегей чергелиг спорт мастери, Россияның “Дайынчы Алдар” ордениниң эдилекчизи, Тыва Республиканың күш-культура болгаш спорттуң тергиини деп хөрек демдээниң эдилекчизи.
Маргылдааның түңнелинде Хартыга мөге Кайгал-оол Ондар (Сүт-Хөл кожуун) шүүлген, Чаан мөге Айдың Монгуш үжүүрлешкен. 3-4-кү шаңналдыг черде кожуун Чааны Түметей Ширижик биле Хартыга мөге Начын-Мерген Ооржак. 5-8-ки черлерже кирген шыырак мөгелер: Арзылаң мөге Мөңге-Эртине Куулар, Хартыга мөге Эртине Хомушку, Начын мөге Бады-Маадыр Самдан база кожуун Арзылаңы Аяс Монгуш.
Алексей ЧАМБАЛ-ООЛ, спорттуң хоочуну.
Чуруктарны ТР-ниң Спорт яамызындан алган.
“Шын” №47 2025 чылдың декабрь 4