Национал төлевилелдер ачызында

Республиканың эмнелгелеринде Кадык камгалалынга хамаарышкан национал төлевилелдер болгаш регион удуртулгазының деткимчези кончуг улуг рольду ойнап, чурттакчы чонга эмчи дузазын алырынга эптиг байдалды тургузуп турар.

Оларның аразында Тес-Хем кожууннуң төп эмнелгези күрүне деткимчезиниң ачызында сайзырап турары көскү. Ол дугайын улуг эмчиниң оралакчызы Буян Маадыр-оол-биле сургакчылаашкын үезинде чугаалаштывыс.

Ооң мурнунда кожууннуң төп эмнелгезинге 1997 чылдың хөрек тырттырар рентген аппарады ажылдап турган. Дериг-херексел эргижирээнинден изээш, ажылдавайн баарга, оочурда аарыг кижилер манаар ужурга таваржып турган. Эмчилерниң-даа, хынадып келген кижилерниң-даа үезин чип турган. 2021 чылда Кадык камгалалының “Баштайгы модернизация” деп программазы-биле чаа рентген аппарадын алган. Келген улус хөй үезин эрттирип, манап-даа турбас апарган.

Аңаа немей шимчеп чоруур рентген аппарадын база алганнар. Ооң мурнунда ук эмнелгеге ындыг дериг-херексел турбаанын улуг эмчиниң оралакчызы демдеглээн. Чыдар аарыг кижилерни рентген кабинединче эккеп турбайн, аппаратты аарыг кижиниң чыдар эмнелгезинге аппаргаш, эмчи шинчилгезин эрттириптери эптиг апарган.
Эргижирей берген УЗИ аппарадын чаа дериг-херексел-биле база солаан. Чаа аппарат эрги дериг-херекселге деңнээрге, хүлээлгелери хөй, эрги аппаратка көзүлбес чүүлдерни безин көрүптер шынарлыг. Ол ышкаш диш эмчизиниң өрээли база бүрүнү-биле дериттинген.
2022 чылда Тес-Хем кожууннуң төп эмнелгезинге 3 автомобильди база берген. Баштай шимчеп чоруур фельдшер-акушер пунктузун алган. Ук автомобиль иштинде дүрген дуза чедирер бүгү-ле дериг-херексел-биле чүмнеттинген. Ооң дузазы-биле кожууннуң суурларынче болгаш малчын турлагларже неделяның среда санында тускай эртемниг специалистер чыглып алгаш, үнүүшкүннерни кылып, чурттакчы чонга эгээртинмес дузаны чедирип турар. Ылаңгыя кожуун төвүнче кээп шыдавас сааттыг иелерге ооң ажык-дузазы аажок улуг. Шак-ла ындыг бүгү талазы-биле дериттинген УАЗ автомобильди база алган.

2023 чылда дериг-херексел чок, кожуун төвүнче эмчилээр дээн кижилерни аргыштырарынга болгаш сумуларже, малчын турлагларже саргыга, чумага болгаш өске-даа аарыгларга удур тарылга ажылын кылып чорударынга таарымчалыг УАЗ автомобильди алыр аас-кежиктиг болганнар. Кызыгаар чоогунда О-Шынаа, Ү-Шынаа суурларга чума аарыынга удур профилактиктиг ажылдарны доктаамал чорудар херек дээрзин эпидемиолог эмчи Буян Маадыр-оол демдеглээн.
Чоокта чаа реанимация дериг-херексели-биле чүмнеттинген Некст-ГАЗель автомобильди база алган. Ниитизи-биле Тес-Хем кожууннуң төп эмнелгезинде 4 эмчи дузазы чедирер автомобиль ажылдап турар.

/Чыжыргана СААЯ.
Ада ТЮЛЮШТУҢ тырттырган чуруктары.