Каш хонгаш найысылал Кызылывыска бүгү чурт деңнелиниң улуг спортчу байырлалы болуп эртер – Россияның эр улуг мөгелериниң аразынга хостуг хүрешке юбилейлиг ХХХ дугаар чемпионады июнь 23-27 хүннеринде “Сүбедей” спорт өргээзинге болуп эртер. Аңаа Россияның 43 регионнарындан 400 хире мөгелер кээп киржир.
Шак мындыг улуг маргылдаага мөгелерден аңгыда, хостуг хүреш мөгейикчилери, аарыкчылар, туристер, журналистер дээш хөй-хөй аалчылар кээри билдингир. Ынчангаш Кызыл хоорай аалчыларны хүлээп алырынга белеткенип эгелээн. Хоорай девискээринде оран-саваларның даштыкы хевирин каастап, септеп, кудумчуларны, хөй-ниити черлерин боктан аштап-арыглап, ногаанчыдылга ажылын чорудуп, орук демдектерин чаартып турар.
Бо хүннерде хоорайның кудумчуларында ажыл-иш хайныгып турарын эскерип болур. Чижээ, светофорлар, орук демдектери чуур ажылдар. Доңмас-Суг хемни дургаар хоорайны кежир девискээрлерниң улуг богун аштап-арыглап каапканын эскерип болур, ынчангаш бок чыглыр хире черлерде, ылаңгыя чер бажыңнарлыг кудумчуларда бок октаар улуг бункерлер салып каан. Кол болуушкуннар болуп эртер Московская кудумчузунда орук кыдыын чаагайжыдар улуг ажылдар чоруп турар.
Кызыл хоорайның чурттакчызы билдингир диш эмчизи Эрес Сат бодунуң бодалын илеретти:
''Шак бо улуг белеткел ажылдарынга чурттакчы чон болгаш сайгарлыкчыларның идепкейлиг киржири күзенчиг. Чижээ, садыг-наймаа черлери, кафе-рестораннар арыг-силиг чорукту шыңгыы сагып, хереглекчилерге эптиг байдалдарны тургузар болза эки. А чурттакчы чон бажың-балгадының даштын арыглап, аштап, септеп-селиир.
Чаңгыс чижек. Хоорайның төвү черде хөй чоннуң чемненир ынак чери "Восторг" кафезинге аалчылар-даа, мөгелер-даа чемненип чеде бээри чугаажок, а бо хүнде ук чемненир черниң байдалы муңгаранчыг. Иштинде изиг-ышкам, кондиционерлери ажылдавайн турар, аъш-чем делгээн баартактары чедир соотпас болганындан ында делгээн аъш-чем аймаа изигде үрелип турарынга чон хомудап турар. Шак мындыг улуг болуушкун уткуй, черле эде-хере тыртынып, Тывавыстың адын сыкпас дээш кызар болзувусса эки''.