Кызылдың оруктарының үрели берген черлерин септээр ажылдар уламчылап турар. Амгы үеге чедир муң дөрбелчин метрден хөй орук шывыын септээн. Ажылды Кызыл партизаннар, Иркутская, Калинин кудумчуларында болгаш “Мөңгүлек” аалчылар бажыңының машина тургузар черинде дооскан дээрзин Кызылдың мэриязының хоорай ажыл-агыйының департаментизи дыңнаткан.
Бир дугаарында, тудугнуң негелделериниң аайы-биле асфальт чадарда, белен болзун дээш, бичии оңгарларны калбартып, арыглап алыр ужурлуг.
"Оңгарларны белеткээрде, 4-5 шак хереглеттинер. Хемчээли 60-70 хире дөрбелчин метр болур ужурлуг. Үрелген черни белеткээн соонда, 2 хире шак эртерге, дораан септеп эгелей бээр бис. Оңгарже асфальтыны куткаш, дескилээш, тырыыр"— деп, “Суугу” КХН-ниң орук ажылчыны Байбелек Сулдум тайылбырлаан.
Септелге чорудар девискээрлерни хөй аал чурттаар бажыңнарның чурттакчыларының болгаш сагыш човаачал хамаатыларның дыңнадыынга даянгаш тодарадыр. Кайы-бир девискээрниң ук айтырыын шиитпирлээрде, бажыңыңарның хандырылгазын харыылап турар башкарыкчы компанияга азы дорт Кызылдың мэриязының хоорай ажыл-агыйының департаментизинге дыңнадып болур.
"Бо үеде тускай техника болгаш бригада Калинин кудумчузунда ажылдап турар. Ол дээрге сөөлгүзү эвес-тир, ажылдың хемчээли ам-даа дыка улуг деп демдеглексеп тур мен. Хоорай иштинге орук шимчээшкинин чурттакчыларга таарымчалыг болгаш айыыл чок болдурар дээш, ажылды шалыпкын уламчылаар бис" — деп, Кызылдың мэриязының хоорай ажыл-агыйының департаментизиниң начальнигиниң оралакчызы Анай-Хаак Монгуш чугаалаан.
Бо чоокку үеде өске бажыңнарның девискээрлерин база асфальтылаар деп планнап турар. Бо орук септелгези республиканың чурттакчыларынга болгаш аалчыларынга таарымчалыг байдалды тургузар.
Бистиң корр.
“Шын” №35 2026 чылдың сентябрь 10
"Шын" солуннуң МАХ-каналынга каттыжыңар: max.ru/channel_shyn