Тывада кижилерден өнчү-хөреңги үндүрүглеринге амгы төлевирлер болгаш өрелер чыырының шалыпчы айы ноябрь 25-ке чедир уламчылаар. Республиканың Баштыңы октябрь 25-те чогуур айтыышкынга атты салган. ТР-ниң Саң-хөө яамызының медээзи-биле алырга, ниити өрениң түңү 117,3 сая рубль четкен.
2024 чылдың июньда баштайгы шалыпчы ай эрткен. Ынчан республика чурттакчыларының өнчү-хөреңги үндүрүүнге өрезиниң түңү 150 сая рубль турган. Дөрт ай дургузунда өрени 27 сая рубльга эвээжедип, 123,4 саяга эккелген. Октябрь 20-ниң хүнү-биле эң хөй өре транспорт үндүрүүнде – 61,2 сая деп үндүрүг ажылдакчылары медеглээн. Чер үндүрүүнге өре ийиги черде – 42 сая рубль. Өнчү-хөреңги үндүрүүнге өре — 14 сая ажыг рубль.
Муниципалдыг албан-хаакчылар болгаш үндүрүг ажылдакчылары кирген ажылчын бөлүктер өрелиг улусту кезип, бүдүрүлгелерниң болгаш организацияларның коллективтери-биле ужуражып турар. Үндүрүглерде өрелиг кижилерниң даңзызын ажыл берикчизинче дамчыдып, олар-биле тайылбыр ажылын чорударын сүмелээн.
Хамааты кижи Россияның федералдыг үндүрүг албанының сайтызында электроннуг сервистерни ажыглап, үндүрүг төлекчизиниң бодунуң кабинеди таварыштыр өрелерин болгаш үндүрүглерин төлеп болурун Үндүрүг албаны дыңнаткан. Ол ышкаш күрүне ачы-дуза порталында «Налоги ФЛ» мобильдиг капсырылга база төлевир терминалдары, банкоматтар болгаш чээли организацияларының кассаларынга төлевирлерни кылып болур.
Эт-хөреңги үндүрүглерин муниципалдыг бюджетче киир санаар база оларның орулгазының кол статьязы болур. Ол үндүрүглерни төлевес азы чедир киирбес болза, үндүрүг төлекчилериниң чурттап турар суурлары болгаш хоорайларының хөгжүлдезинче база чаагай чоруунче угланган хемчеглерниң акшаландырыышкыны кызырлы бээр.
А. МОНГУШ.
«Шын» №84 2024 чылдың ноябрь 2