Регионалдыг диспетчер албанының медээзи-биле алырга, август 11-ниң эртенги шагында республиканың арга-арыг фондузунуң девискээринде ниитизи-биле 1964,5 га черде 16 арга-арыг өрттери хып турган база 758 га ниити шөлдүг ийи арга-арыг өрттери өжүртүнген.
Регионалдыг дүрген хөделир албаннарның, муниципалдыг деңнелдиң күштерин болгаш курлавырларын мөөңнеп, ол ышкаш Хакасиядан, Бурятиядан, Поволжьеден, Красноярск крайдан, Омск болгаш Иркутск областардан арга-арыг камгалаар федералдыг авиация албанының ажылдакчыларын хаара туткаш, неделя дургузунда 20 арга-арыг өрттерин өжүрген.
Амгы үеде Каа-Хемниң арга-арыг ажыл-агыйында чедери берге черлеринде чеди өрт хып турар. Өрттерни өжүрер кылдыр ынаар агаар суднолары-биле авиаарга-арыг камгалал ажылдакчыларын чедирген. Тере-Хөл кожуун чагыргазы “Урал” чүък машиназы-биле өрттүң өөскээн черинче 20 кижини чоруткан.
Бай-Хаак, Хову-Аксы, Самагалдай, Шуурмак, Эрзин, Сизим, Кунгуртуг, Тоора-Хем база Чадаана арга-арыг участоктарының девискээрлеринде хып турар өрттер бар. Өрттү өжүреринге 241 кижини база 16 техниканы хаара туткан. Дүүн Эрзинниң арга-арыг участогунуң чедери берге черинде 33 га ниити шөлде хып турар өрттү өжүрер дээш, авиа арга-арыг камгалалының агаар судноларын чоруткан.
Элегестиң база Самагалдайның арга-арыг ажыл-агый участоктарында ийи өрттү өжүреринге 53 кижи база бир техника киришкен.
Регионалдыг Арга-арыг яамызының курлавырында ам-даа 101 кижи болгаш 110 техника бар. Арга-арыг өрттерин өжүреринге дузалажыр дээш, аңгы-аңгы регионнардан арга-арыг камгалаар 194 өртчү келген.
Арга-арыг ажыл-агыйы болгаш бойдус ажыглалының сайыды Григорий Ондар арга-арыг өрттеринге удур демиселге эки турачы өртчүлерни хаара тудуп турар муниципалдыг чагыргаларның дээштиг ажылын демдеглээн. Эки турачы дружиналарның 20 ажыг кежигүннери хүнде ортумаа-биле үнүп турар. «Ниитизи-биле өрттер оожургаан, ынчалза-даа оларны шуут чок кылыр херек» – деп, сайыт демдеглээн.
2025 чылдың өрт айыылының сезону эгелээнден бээр, республикада ниитизи-биле 16600 ажыг гектар шөлде 145 арга-арыг өрттери бүрүткеттинген, ооң иштинде онза камгалалдыг бойдус девискээрлериниң черлеринде, тодаргайлаарга, Тожу кожуунда «Азас» заповедник девискээринде 2,7 гада үш арга-арыг өрттери бүрүткеттинген.
Июльдуң 29-тан республиканың регионалдыг арга-арыгларында онза байдал чурумун чарлаан болгаш, ынаар хамаатыларның база транспорт аймааның кирери хоруглуг. Арга-арыгже кирер черлерде постуларны тургускан, арга-арыг инспекторлары чурумнуң негелделерин күүседип турарын хынап, тус черлерде хайгыыл ажылын чорудуп турар.
Бистиң корр.
Чурукту интернеттен хоолгалаан.
“Шын” №31 2025 чылдың август 14