Некролог

Тываның көдээ ажыл-агыйының хоочуну Вадим Орамбалович Оюннуң “аъдының бажы” хоя берген

Тываның Баштыңы Владислав Ховалыг болгаш республика Чазааның кежигүннери россий күрүне болгаш хөй-ниити ажылдакчызы Вадим Орамбалович Оюннуң хенертен мөчээни-биле ооң дөргүл-төрелдеринге болгаш чоок кижилеринге ханы кажыыдалын илереткен.

Вадим Орамбалович Кызыл хоорай чурттуг, ынчалза-даа бо быжыг, билиг-мергежилдиг болгаш сагыш човаачал ишчиниң бүгү назыны республиканың көдээ ажыл-агыйы-биле холбашкан.

Ол 1968 чылда Москваның К.А. Тимирязев аттыг көдээ ажыл-агый академиязын дооскан. Күш-ажылчы намдарын Чөөн-Хемчик районнуң «Сүт-Хөл» совхозунга кол агрономнап эгелээн, ооң соонда Чөөн-Хемчик районнуң «Большевик», Кызыл районнуң «Тиилелге» совхозтарынга директорлаан. Ол Тыва АССР-ден ССРЭ-ниң Дээди Совединиң 11 чыыжының Националдар Чөвүлелиниң депутады (1984–1989) чораан. 1989 чылдан тура Тыва Республиканың көдээ ажыл-агый сайыды, Тыва Республиканың Чазак Даргазының бирги оралакчызы. 1996 чылдан тура Россия Федерациязының Пенсия фондузунуң Тыва Республика талазы-биле салбырын удуртуп турган.

Бодунуң күш-ажылчы намдарының дургузунда Вадим Орамбалович күрүнениң болгаш көдээ ажыл-агый адырының хөй-хөй шаңналдары-биле шаңнаткан. 1984 чылда Вадим Орамбалович «Хүндүткелдиң демдээ» орден-биле, 1982 чылда – ВДНХ-ның хүлер медалы-биле, 1984 чылда – ВДНХ-ның мөңгүн медалы-биле 1987 чылда – ВДНХ-ның алдын медалы-биле, 1988 чылда – “Кур черлерниң шиңгээлдези дээш” медаль-биле шаңнаткан. 1999 чылда аңаа “Тыва Республиканың алдарлыг ажылдакчызы” атты тывыскан, 2004 чылда ол Тыва Республиканың «Күш-ажылчы шылгарал дээш» деп медалы-биле, 2013 чылда – Тыва Республиканың Соңгулда комиссиязының Хүндүлел бижии-биле, 2014 чылда – Россия биле Тываның эвилелдешкениниң болгаш Кызыл хоорайның тургустунганының 100 чылдаанынга тураскааткан юбилейлиг мелаль-биле шаңнаткан. Күш-ажылчы ниити стажы – 37 чыл, адырга ажылдап келгени стажы – 26 чыл.