10 чаа автомашинаны тыва алган
РФ-тиң Чазааның апрель 18-те № 1066-р айтыышкыны езугаар дүрген эмчи дузазы чедирер он чаа автомашиналарны Тывада эккелген дугайында, ук автомашиналарны эмнелге албан черлеринге дамчыдар езулалга киржип турган республиканың Баштыңы Шолбан Кара-оол бодунуң блогунда бижээн.
«Бөгүн коронавируска удур демисежип турар эмнелге албан черлеринге немелде күш болур, 10 чаа дүрген дуза чедирер автомашиналарны алдывыс. Бо автомашиналар Россияда бүдүрүп турар Форд Транзит, УАЗ Патриот болгаш ГАЗ Некст деп билдингир маркаларның тускай автомашиналары-дыр. Республиканың № 1 болгаш халдавырлыг аарыглар эмнелгелеринге бир-бир «Форд» автомашиналарын, ол ышкаш медицина катастроф болгаш дүрген дуза төвүнге – ийи Патриотту болгаш алды ГАЗельдерни дамчыттывыс. Эмчилерниң дүрген, шимченгир болуру кезээде чугула, чүге дизе кижилерниң амы-тынын камгалаарда минута хамаанчок, секунда бүрүзү үнелиг. А чаа инфекциядан камгаланыр херекке оперативтиг болуру чедиишкинниң бир кол өзээ» – деп, ол бижээн.
Шолбан Кара-оол бо хүн дораан чаа автомашиналарга кыйгыртыышкыннарже үнүп эгелээр эмчи бригадаларынга кадыкшылды болгаш чедиишкиннерни күзээн. РФ-тиң Чазааның 1066-р айтыышкыны езугаар чурттуң 85 регионнарынга, ооң иштинде Тыва база кирип турар, ниитизи-биле 1258 дүрген дуза автомашиналарын хувааган дугайында РФ-тиң Чазааның сайтызында дыңнадып бижээн.
#Шын