Тываның Баштыңы Владислав Ховалыг Никита Михалковтуң Москвада «Мастерская «12» театрының ажылдакчылары – театрның режиссеру Игорь Попов, шии тургузар кезээниң эргелекчизи Иван Неделяев база труппаның удуртукчузу Анастасия Голованова-биле ужурашкан. Чогаадыкчы команда Тываже гастрольдаарының аргазын база В.Көк-оол аттыг национал театрынга ажылдаарының байдалын билип алыры-биле аалдап келген.
Михалковтуң театры IV делегей чергелиг буддийжи шуулганның культурлуг программазынга киржип база ийи онзагай хүннер: Тыва национал театрның 90 чылдаанынга болгаш Россияның Театр ажылдакчыларының эвилелиниң 150 чылдаанынга тураскаадып оюн көргүзүүн таныштырар планныг.
Тываның Баштыңы Владислав Ховалыг аалчылар В.Көк-оол аттыг национал театрның сценазының техниктиг негелделерин, каасталга кылырының аргаларын, театрның иштики байдалын, ооң иштинде кеттинер өрээлдерни, репетиция өрээлдерин, балет залдарын көрүп келгенде, олар-биле ужурашкан. Моон соңгааргы кады ажылдажылганы база гастроль төлевилелин боттандырарының аргаларын регионнуң удуртукчузу-биле чугаалашкан.
«Чурттуң найысылалындан кээр шии шыңгыы белеткелди негеп турар. Тываның чурттакчылары улуг хоорайже чорбайн, ат-сураглыг артистерни маңаа көөрү ховар таварылга. Бистиң театр ниитилелинге ол дээрге чурттуң башкарыкчы коллективи-биле харылзааны быжыглаары-дыр» — деп, республиканың Баштыңы демдеглээн. Бистиң чаңгыс чер чурттугларывыс аалчыларын уткуп-хүлээп, «Мастерская «12» театрның гастрольдары чедиишкинниг эртеринге шыңгыы белеткенир дээрзинге бүзүрелин илереткен.
Москва театрының делегациязы Тывага ийи хонуктуң дургузунда регионнуң культурлуг болгаш төөгүлүг онзагай черлерин көрген. Аалчылар Национал музейни база Тубтен Шедруб Линг сарыг шажын хүрээзин сонуургап, Тыва национал оркестрниң чогаадыкчы ажыл-ижин көргеннер. «Сырын хаттың тоожузу» деп шииниң көргүзүү-биле оларның республикага программазы доозулган. Шии Москваның театр ажылдакчыларын кайгаткан. Олар артистерниң ойнаанын, чурукчуларның ажылын, шииниң техниктиг, ооң иштинде чырык, үн болгаш видео каасталгаларының шынарын бедии-биле үнелээн.
ТР-ниң Чазааның парлалга албаны.