Ногаа аймааның калорийи эвээш, хөй-хөй витаминнер, микроэлементилер, ажыктыг бүдүмелдер-биле байлак.
Бүгү-делегейниң кадык камгалал албан чериниң сүмелеп турары-биле алырга, хүнде 400 граммдан эвээш эвес ногаа болгаш чимис аймаан чип турарга эки. Аңаа картофель дээн ышкаш крахмалдыг ногаалар хамаарышпас.
Үргүлчү хөй ногаа, чимис аймаан чеминде ажыглап турар кижилерниң аъш-чем хайылдырар органнарынга рак аарыы белен тывылбас.
Хүннүң-не ногаа аймаан чип турарга, атеросклероз, чүректиң ишемиктиг аарыы дээш оон-даа өске чүрек-дамыр аарыглары, ийиги чаданың чигир аарыы, семириири дээн ышкаш хоочу аарыглар тыптыр чылдагааннар эвээжээр.
Ногаа аймаа аъш-чем хайылдырарын экижидер, тырыктаарын болдурбас, организмде бүдүмелдер солчулгазын экижидип, аар металлдарны организмден үндүрер.
Чурукту интернеттен хоолгалаан.
2025 чылдың август 21 “Шын” №32