Чоокта чаа тургустунган «Ада-чурт камгалакчылары» күрүне фондузунуң регионалдыг салбырынга ТР-ниң Кадык камгалал яамызының база республиканың эмнелге албан черлериниң төлээлериниң хуралы болуп эрткен.
Аңаа тускай шериг операциязының киржикчилеринге, дайынчы хөделиишкиннер хоочуннарынга база оларның өг-бүлелеринге эмчиниң, наркологтуң болгаш психотерапевтиң дузазын көргүзер талазы-биле «ногаан коридор», ол ышкаш реабилитация эртериниң дугайында сайгарып чугаалашкан.
Эмчи дузазы алырда, кайнаар баарын ТШО-нуң киржикчилери база оларның өг-бүлелери эки билбес деп, ук фондунуң ажылдакчылары чугаалап турар. 55-ки мото-адыгжы (даг) бригаданың шериглери Республиканың 1 дугаар база Халдавырлыг аарыглар эмнелгезинде эмнедип турар дээрзин Кадык камгалал яамызының ажылдакчылары медеглээн.
А шериг албанындан халашкан база дайынчы хөделиишкиннер хоочуннары, ол ышкаш оларның өг-бүлелери Республиканың 2 дугаар эмнелгезинче, ол ышкаш чурттап турар чериниң аайы-биле поликлиникаларже баргаш, эмнедип болур.
ТШО-нуң киржикчилери стоматолог кабинеттеринге база халас эмнедир. Шериглерни хүлээп алыр эмнелге албан черлериниң адрестерин Регионалдыг кадык камгалал яамызының социал четкилерде хуу арнында чарлаан.
Хурал үезинде ТШО киржикчилериниң, дайынчы хөделиишкиннер хоочуннарының хөй кезии эмчи специалистерже кирер оочурга турар күзели чок деп, эмчилер чугаалаан. Эмчи доп-дораан хүлээп алзын деп болганчок-ла негелделер кылырлар. Эмнелгелерде кээп турар аарыг кижилерниң аразында арга-шинээ кызыгаарлыг кижилер база оочурун манап турар болгай деп, специалистер демдеглээн.
Ол ышкаш дайынчыларны хоорайдан дашкаар дыштандырарының дугайында база чугаалашкан. «Ада-чурт камгалакчылары» күрүне фондузунуң регионалдыг салбырының удуртукчузу Мерген Кызыл-оолдуң чугаазы-биле алырга, Дус-Хөлдүң эриинге база Кызыл кожууннуң Черби суурдан ырак эвесте дыштанылга зоназынга кадыын быжыктырып, күш кирип алыр арга бар. Дус-Хөлде ТШО киржикчилеринге болгаш оларның өг-бүлелеринге эмненир пансионаттар бар, ында оларга эмчи массажы база көрдүнген. Чербиде майгын лагерин тургускан, аңаа дыштаныкчыларга психологтар хүлээп алыышкынын база чорудар.
Бүзүрел телефонун таварыштыр 8-800-2000-122, 8-962-062-3333 дугаарларже долгааш, психологтуң консультациязын база ап болур.
"Шын" №47 2023 чылдың июнь 28