Бүгү делегейниң школа библиотекаларының хүнүнде Чөөн-Хемчик кожуунга “Эң-не тергиин библиотекарь башкы” мөөрей чедиишкинниг болуп эрткен. Бо болуушкун амгы үениң өөредилгезинге школа библиотекарының ажылының үнелеп четпес чугулазын болгаш ооң хөй талалыын, ажыл-ижинге кызыгаар чок бердингенин, чогаадыкчы чоруун, салым-чаяанын көргүзер ёзулуг байырлал болган. Бо мөөрей библиотекарь башкыларның профессионал чаңчылдарын, чогаадыкчы деңнелин болгаш чаа-чаа онзагай үзел-бодалдарын көргүзер кайгамчыктыг арга болган. Ол кайгамчык солун 3 чададан тургустунган.
Бирээде, “Мен – ном мен” деп чадазынга киржикчилер боттарының ынак номнары кылдыр кеттинип алгаш, боттарын таныштырган. Оларның кайгамчыктыг чечен чугааларындан чүгле хүн бүрүде ажылының дугайында эвес, а кол-ла чүүл чалыы номчукчуларга эң-не үнелиг чүүлдерни дамчыдып турары көзүлген.
Ийиде, “Салым-чаяан” деп чадазынга библиотекарь кижиниң хүн бүрүде ажылының артында чүнүң чаштып чыдарын көргүскен. Киржикчилер ыр-шоору, аянныг номчулгалары, кыска көргүзүглери-биле боттарының артистерсиин, иштики делегейиниң байлаан көргүзүп, көрүкчүлерниң чүректерин чаалап алганнар.
Үште “Авангард” деп чадазын келир үеде библиотека ажылынга тураскааткан. Башкылар школа библиоткаларының ажылын чаа деңнелче көдүрүп, сайзырадырынга ажыктыг эң-не дидим, чогаадыкчы идеяларны, библиотекарьның ажылынга ажыглаар эптиг аргаларын көргүскеннер.
Күжениишкинниг-даа болза, эп-найыралдыг демиселдиң түңнелинде Хорум-Даг школазының библиотекарь башкызы Рада Ооржак тиилекчи болган. Ооң ажылынга мергежээни болгаш бердингени эң-не бедик үнелелди алган. “Ном саңының чүрээ” деп номинацияга Теве-Хая ортумак школазының библиотекарь башкызы Шончалай Ондарны ном саңынга келген кижи бүрүзүнүң сагыш-сеткилинге чылыг-чымчак хамаарылганы сөңнеп чорууру дээш шаңнаан. Хайыракан ортумак школазының башкызы Любовь Чылбак-оол чалыы номчукчуларга кызыгаар чок билиглер делегейин ажыдып билири дээш “Билиглер делегейинде айтыкчы” деп номинацияга төлептиг болган. Номнарга болгаш номчулгага ынакшылын оттуруп билири дээш “Номчулгаже хей-аът киирикчизи” деп номинацияны Бажың-Алаак ортумак школазының библиотекары Кара-Кат Кунчунга тывыскан. Мөөрей чылыг-чырык чогаадыкчы бедик деңнелге эрткен.
Бүгү делегейниң школа библиотекарьларының хүнүн чылдың-на октябрь айның 4 дугаар понедельнигинде демдеглеп эрттирип турар. Бо удаа ол октябрь 26-да болган. Библиотекарь башкыларга профессионал байырлалын таварыштыр байырны чедирип, хей-аът көдүрлүүшкүннүг ажылдаарын, өөрүп четтиргенин илередип чоруур, сонуургак номчукчуларлыг болурун, ажыл-ижинге чаа-чаа чедиишкиннерни, ал-боттарынга аас-кежикти мөөрейниң эрттирикчилери күзээн.
Бистиң корр.
Медээни болгаш чуруктарны Чөөн-Хемчик кожууннуң чагыргазындан алган.
«Шын» №42 2026 чылдың октябрь 29
"Шын" солуннуң МАХ-каналынга каттыжыңар: max.ru/channel_shyn