Удавас Херээженнер байырлалы Март 8 болгай, ынчангаш Мөрен сумузунуң ном саңының ажылдакчыларының дугайында бижикседим. Кымнарыл ол дээрге ном саңының эргелекчизи Долита Ликтановна Бичелдей биле библиотекарь Лилия Борисовна Анзай-дыр.
Оларның кылып чоруур ажыл-ижин езулуг чогаадыкчы, буянныг иш деп көөр мен. Сумунуң чону, ылаңгыя улуг назынныг хоочуннар, школачылар ном саңындан үзүлбес. Номга сонуургалдыглар библиотекага баргаш, чүгле номнар бижидип алыр эвес, телевизордан солун дамчыдылгалар көрүп, янзы-бүрү өөредиглиг, чогаадыкчы хемчеглерге киржип турар. Бичии уругларга аңгы өрээлде дыка чараш чуруктарлыг номнар, сеткүүлдерни дерээн, тускай ойнаар булуң безин бар.
Ном саңының ажылдакчылары номчукчуларын хаара тыртар дээш, амгы үении-биле чаартылгалыг, чогаадыкчы ажылдап турарлар. Оларның эки ажылын үнелеп турар бис. Номчукчуларыңар көвей-ле болзун!
Ажыл-сүзүү, чедиишкиннер
Ам-даа улай нептерезин.
Чогаадыкчы үүлеңер
Чогуп-бүдүп чоруур болзун.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.
«Шын» №17 2024 чылдың март 6