Хостуг кижизидилгеге үндезилээн, башкылаашкынның кайгамчык аргазын ажыглааны-биле алдаржаан итали педагог болгаш эмчи Мария Монтессориниң демдеглелдер кыдыраажындан ада-иелерге сүмелерни бо рубрикага салыр бис.
Чаш уругга номчулганың ажыы чүл?
Чаш уругнуң мээзи чаа чүүлдерни дыка дүрген шиңгээдип алыр. Бир харлаарынга чедир секунда бүрүзүнде 700 ажыг нейрон ооң мээзинге тыптып турар. Ынчангаш чаш уругга тоолдар номчуп бээрге, ооң мээзи сайзыраар. Номчулга ажыктыг дээрзин ол ыяк сактып алыр. Ада-иезиниң тоолдарын дыңнап өскен төлге номчулга чаңчыл апаар.
Номчулга чүге чугулал?
Бирээде, уруг хөлчок өөрениичел. Ийиде, уруглар чаңчылдарга дыка ынак. Ынчангаш кежээ удуур бетинде авазы азы ачазы-биле кады үе эрттирип, номчуттунары оларга чаңчыл апаар.
Ада-иезиниң номга ынакшылын көргеш, чаш кижи база ону өттүнер, бодунуң бодалдарын, сагыш-сеткилин тодаргай илередип билир боор. Үжүк-бижик билир апаргаш, ала-чайгаар номга ынак кижи болур. Солун төөгүлер дыңнаарга, уругларның сайзыралынга ажыктыг, делегейже көрүжү делгемчиир.
Ынчангаш номчуттунарын хүн чурумунче киирип алыңар. Ажы-төлүңер силерниң номга ынааңарны көргеш, номчуттунары чугула деп билип алыр болзун.
Айдың ОНДАР.
«Шын» №93 2024 чылдың декабрь 4