Октябрь 11-де Спутник микрорайонунда Культурлуг хөгжүлде төвүнге Тываның К.И. Чуковский аттыг уруглар ном саңының 55 чыл оюнга тураскааткан байырлыг хемчег болуп эрткен. Аңаа ТР-ниң культура сайыды Виктор Чигжит, РФ-те Тывадан сенатор Шолбан Күжүгет, ТР-ниң ДХ-ның депутады Ролан Ооржак, республиканың культура албан черлериниң удуртукчулары, ном саңының хоочуннары, чогаалчылар, журналистер болгаш өскелер-даа чаладып киришкен.
Юбилейин демдеглеп турар республиканың кол уруглар саңының төөгүзү болгаш чедиишкиннери, чаа үениң негелдези ёзугаар чоруп олурар хөгжүлдезиниң дугайында байырлыг хемчегге көргүскен кыска роликтен чыылганнар билип алган.
Тываның культура сайыды Виктор Чигжит чыылганнарга байыр чедиргеш, хөй чылдарда библиотека системазынга ажылдап чораан хоочуннарның болгаш амгы ажылдап турар ном саңының ажылдакчыларының өзүп олурар салгалды номга ынак кылдыр кижизидеринге киирген улуг үлүг-хуузун үнелеп демдеглээш, дараазында шаңналдарны тывыскан:
“ТР-ниң культура болгаш уран чүүлүнүң хүндүлүг хоочуну” хөрек демдээ-биле библиотека системазының хоочуну Евдокия Афанасьевна Залуцкаяны шаңнаан. “ТР-ниң культуразының тергиини” хөрек демдээн хоочун Ирина Витальевна Подикке болгаш К.И. Чуковский аттыг ном саңының ажылдакчылары Өнермаа Достай-ооловна Амырмит, Сырга Владимировна Ондар, Ольга Казаковна Хиигет, Саяна Маадыр-ооловна Ооржакка тывыскан. Ол ышкаш ТР-ниң Культура яамызының Хүндүлел бижии-биле Сылдысмаа Борисовна Лопсан биле Алена Алексеевна Монгуш шаңнаткан. Аргерек Кудерекович Донгак, Чодураа Ушпасовна Куулар, Айыраа Мергеновна Монгуш, Евгения Николаевна Чигжит ТР-ниң Культура яамызының өөрүп четтириишкин бижиктерин алган.
РФ-те Тывадан сенатор Шолбан Күжүгет чаладып киришкеш, уругларның ном саңының юбилейи анаа-ла албан ёзунуң байырлыг хемчээ эвес, улуг чырык байырлал-дыр деп демдеглээн: “Бо байырлал чашкы шаавысче аян-чорук болгаш эң-не кол чүүл – номга ынакшыл дугайында чугаа-дыр. Бодум бичиимден тура номга онзагай хамаарылгалыг турган мен. Номну ажыдарга, анаа-ла үжүктерлиг арыннар эвес, а кайгамчыктыг делегейже эжикти ажыдып киргени болур. Ном – уругларны бичиизинден тура эки сеткилге, шынчы, дидим болгаш чөптүг чорукка кижизидип өөредип турар. Библиоте- ка – тоолдарның дирлир, чаа төөгүлерниң төрүттүнер чери болгаш ёзулуг культурлуг төп болуп турар. Ында ажылдап турар ном саңының ажылдакчылары чүгле номнарны кадагалап турарыңардан аңгыда, келир үени база кадагалап арттырарынга дыка улуг ажылды чорудуп турар. Номга ынак кижи дээрге-ле дээди улуг ажыл-херектерни кылып шыдаар кижи-дир” – деп, ол чугаалаан. Сенатор К. Чуковский аттыг ном саңының коллективинге моон-даа соңгаар чедиишкиннерни, хөй номчукчуларны болгаш чаа-чаа хөй номнарлыг болурун күзээш, бодунуң мурнундан Өөрүп четтириишкин бижиин ном саңының хоочуннары Өнермаа Амырбит биле Саадак Салчакка тывыскан.
Ол-ла байырлыг хурал үезинде Лолита Ховалыг, Аяна Кара-Сал, Евгения Монгуш, Аэлита Хомушку, Азиада Ооржакка ТР-ниң Дээди Хуралының мурнундан Өөрүп четтириишкин болгаш хүндүлел бижиктерни депутат Ролан Ооржак тывыскан. Оон-даа өске шаңналдар болгаш байыр чедириишкини ол хүн хөй болган.
Юбилейлиг байырлалга К. Чуковский аттыг ном саңының ажылдакчылары боттарының мурнундан концерт номерлерин база көргүскенин чыылганнар онзазынган. Оон аңгыда кадыы кызыгаарлыг уругларның холу-биле кылган номнары болгаш ном саңының тергиин дирткен чедиишкиннериниң делгелгези болган хемчегге база бир онзагай черни ээлээн.
Чечен сөстүӊ аяны
Тываның К.И. Чуковский аттыг уруглар ном саңының 55 чыл оюнга тураскааткан хемчеглер чыл дургузунда эрткилээн. Оларның бирээ- зи – «Чечен сөстүӊ аяны» республика чергелиг уруглар аразынга уран номчулга мөөрейи.
Октябрь 11-де школачыларның төрээн дылынга ынакшылын оттурар, уран номчулгага сонуургалын бедидер болгаш тыва чогаалды уруглар аразынга нептередир сорулгалыг эрткен мөөрейниң тиилекчилерин илередип үндүрген.
“Бистиң ном саңының 55 чыл ою болгаш «Сылдысчыгаш» уруглар солунунуң 80 харлаан оюнга тураскааткан уран номчулга мөөрейин чылдың эгезинде чарлаан бис. Кожуун чергелиг чадазы июнь айга чедир эрткен. Ооң тиилекчилери 12 уруг шылгарап үнген, бөгүн мында 11 уруг киржип чедип келгеш, кайгамчык чараш шүлүктерни номчуп, бисти өөртүп турлар. Уругларның тыва дылынга уран номчулгазы бедик деңнелдиг деп үнелеп көрдүвүс” – деп, Тываның К.И. Чуковский аттыг уругларның ном саңының директору Сылдысмаа Лопсан чугаалаан.
“Ниитизи-биле мөөрей киржикчилериниң тыва дылынга уран номчулгазы эки, харын-даа артисчи талазын кончуг шылгараңгай көргүзүп турар уруглар бары өөрүнчүг-дүр” – деп, мөөрейниң жюри кежигүнү, уруглар чогаалчызы Александр Шоюндемдеглээн.
Мөөрейниң республика чадазынга дараазында шылгарааннарны жюри түңнеп үндүрген:
5-9 харлыг уруглар аразынга Сухбат Ооржак тиилекчи болган. 2-ги черни – Бадма Шалык, 3-кү черни Буянды Куулар ээлээн.
10-15 харлыг уруглар аразынга Айнур Саая тиилээн, 2-ги черни – Отчугаш Доржу, 3-кү черге Шолбан Ондар төлептиг болган.
Тиилекчилерге шаңналдарны Тываның К.И. Чуковский аттыг ном саңының 55 чыл оюн демдеглээн байырлыг хемчегге тывыскан.
/ Сорунза МОНГУШ.
Чуруктарны К.И. Чуковский уруглар ном саңының четкизинден алган.
“Шын” №40 2025 чылдың октябрь 16