Май 25-те Тыва үндезин культура төвүнге Бүгү-россияның библиотека хүнүнге уткуштур ТР-ниң Культура яамызының болгаш Тываның библиотека ассоциациязының “НОМ” Национал шаңналын тывыскан байырлыг хурал болуп эрткен. Аңаа Тываның культура сайыды Виктор Чигжит, Тываның культура ажылдакчыларының профэвилелиниң удуртукчузу Галина Сюрюн, Тываның культура болгаш уран чүүлүнүң Хоочуннар эвилелиниң даргазы Зоя Монгуш чыылганнарга байыр чедирген.
Болган хемчегге “НОМ” Национал шаңналдың 11 номинациязынга төлептиг эң дээре библиотека ажылдакчылары болгаш кылган эртем-шинчилел ажылдары-биле шылгарааннарны илереткен:
1.“Эң дээре эртем-шинчилел ажылы” номинацияның шаңналынга ТывКУ-нуң Эртем библиотеказының килдис эргелекчизи Айлуна Дандыр төлептиг болган;
2. “Аныяк библиотекарь” – С.О Тамба аттыг Каа-Хемниң Төп кожуун библиотеказының библиотекарь-методизи Виолетта Доржу;
3. “Эң дээре комплектатор” — К.И. Чуковский аттыг уруглар библиотеказының фондузун чыыр килдизиниң эргелекчизи Айна Оюн;
4. «Эң дээре библиограф”– Өвүрнүң М.Б. Доржу аттыг Төп кожуун библиотеказының библиогравы Эмма Донгак;
5. «Эң дээре библиотекарь”– А.С. Пушкин аттыг Национал библиотеканың социал-экономика талазы-биле литература килдизиниң эргелекчизи Радмила Оюн;
6 «Эң дээре методист” – С.О. Тамба аттыг Каа-Хемниң төп кожуун библиотеказының методизи Чойгана Монгуш;
7. «Мергежилинге шынчы бердингени дээш” – Ак-Чыраа суурнуң библиотеказының эргелекчизи Наталья Лопсан;
8. «Эң дээре дагдыныкчы”– Чеди-Хөлдүң төп кожуун библиотеказының килдис эргелекчизи Шолбанмаа Соян;
9. “Эң дээре чурт шинчилекчизи” – Бии-Хемниң төп кожуун библиотеказының чурт-шинчилел килдизиниң эргелекчизи Ай-кыс Шырап;
10. “Чылдың өде халыышкыны” – Чаа-Хөлдүң төп кожуун библиотеказы;
11. «Чылдың эң дээре библиотеказы” номинацияга Сүт-Хөлдүң төп ном саңы төлептиг болган.
Ол-ла байырлыг хуралга эки ажылдыг ном саңының ажылдакчыларынга күрүне шаңналдарын, Культура яамызының мурнундан хүндүлел бижиктер, өөрүп четтириишкин бижиктерин тывыскан:
“Тыва Республиканың культуразының алдарлыг ажылдакчызы” бедик атка А.С. Пушкин аттыг Национал библиотеканың Национал чурт-шинчилел литературазының килдизинде күрүне библиографиязының секторунуң эргелекчизи Галина Комбу болгаш көдээ ажыл-агый литературазының килдизиниң кол библиотекары Светлана Салчак төлептиг болганнар.
А.С. Пушкин аттыг Национал библиотеканың директору Ирина Эртинеге Сенатор Дина Оюннуң мурнундан өөрүп четтириишкин бижиин тывыскан.
Ол ышкаш Елена Монгуш Тываның культура яамызының өөрүп четтириишкин бижиин алган. “Тываның культуразының тергиини” хөрек демдээ-биле А.С. Пушкин аттыг Национал библиотеканың ниити номчулга залының эргелекчизи Чинчи Ондар, абонемент килдизиниң эргелекчизи Уран Донгак болгаш директорнуң оралакчызы Айлаңмаа Аракчаа шаңнатканнар.
Бүгү-россияның Библиотека хүнүнге уткуштур “Ном саңынга дүн” деп акцияга республиканың библиотекалары идепкейлиг киржип, аңгы-аңгы хемчеглерни эрттиргилээн. Ол хүн Тываның хөйге билдингир артистери ном саңының күзенчиг аалчылары болуп, ыр-шоорун чыылганнарга бараалгадып, уран сөске мастер-класстарны эрттирип, солун оюннарны организастап, акцияга киришкеннер. Ол ышкаш чарлаттынган акция-биле А.Пушкин аттыг ном саңының ажылдакчылары Кызылдың 104 дугаарлыг пассажирлер аргыштырар маршрудунга “Номчуттунар автобус” деп хемчегни организастааны солун болган.
Ниитизи-биле болган “Ном саңынга дүн” акцияның хемчеглеринге номга ынактар чыглып, чаа-чаа чүүлдерни билип ап, сагыш-сеткили улам сергектелип тараан.
Сорунза МОНГУШ.
Чуруктарны интернеттен алган.
"Шын" №39 2023 чылдың май 31