Тыва телевидениениң хоочуну-биле ужуражылга
Ноябрь 20-де, Телевидение хүнүнүң бүдүүзүнде, Тываның журналистер эвилелиниң өрээлинге Тываның күрүне университединиң журналистика салбырының 2-ги курузунуң студентилери тыва телевидениениң баштайгы дикторларының бирээзи, ССРЭ-ниң телевидение болгаш радионуң тергиини, ТР-ниң алдарлыг ажылдакчызы, Кызыл хоорайның хүндүлүг хамаатызы Дыдый Давааевна Сотпа-биле ужурашкан.
Тываның журналистер эвилелиниң өрээлинге болган ужуражылганың аалчызы бистиң салган айтырыгларывыска күзелдии-биле харыылап, тыва телевидениеге бодунуң эрткен оруун, бир дугаар эфирже канчаар үнүп эгелээнин чугаалап, частырыгларын болгаш хөктүг таварылгаларын сактып, ажыт-чажыт чок үлешкен.
Дыдый Давааевна эфирге канчаар алдынарын, үннү шын таарыштырып алыры, шын чугаалаары, дикцияны экижидип алыры-биле практиктиг сүмелерни берип, импровизациядан кортпайн, частырыглардан өөренип алырын сүмелээн. Ол тыва дылды кадагалап арттырарынче онза кичээнгейни угландырып, биске чагыг-сүмезин берген. Ылаңгыя аныяк журналистерге төрээн чугаазы болгаш культуразы-биле харылзаазын үспезин сагындырган. Студентилерже көргеш, оларны бодунуң аныяк үезиниң көрүнчүү деп көрүп турарын миннип, ужуражылгага шынчы сеткил болгаш чылыгны немээн.
Хоочун-биле ужуражылга биске, келир үениң журналистеринге, чугула кичээл болгаш уттундурбас солун болуушкун болган. Дыдый Давааевнаның хууда арга-дуржулгазы, профессионал деңнели, чагыг сөстерлиг күзээшкиннери келир үеде журналист болуксаан сорулгавысты улам күштелдирген.
Диана ХОМУШКУ,
ТывКУ-нуң журналистика факультединиң 2-ги курсчузу.
Авторнуң тырттырган чуруу.