Тыва Республика – тускай шериг операциязында киржип турар чаңгыс чер чурттугларынга улуг Тдуза кадып турар регионнарның бирээзи.
Материалдыг дуза кадар ажыл доктаамал уламчылап турар. Дайынчыларга-даа, тус черниң тайбың чурттакчыларынга-даа республиканың эриг баарлыг чону болгаш аңгы-аңгы организациялар гуманитарлыг дузаны чыып, чорудуп турар.
Ноябрь 17-де Армияның төп спортчу клувунуң (ЦСКА) директору коллективиниң өмүнээзинден дайынчыларга чугула херек дериг-херекселди Кызыл хоорайда Кызыл партизаннар кудумчузунда 30 дугаарлыг бажыңда Ада-чурттуң дайынчыларының өг-бүлелериниң комитединге, Бүгү-российжи улусчу фронтунуң регион организациязының күүсекчи комитединге кээп хүлээткен.
«Коллективтиң чыгган акша-төгерии-биле саткан ок болгаш өске-даа дайынчы херекселдерни бодунга ап чоруурунга эптиг, хөй кармактарлыг жилеттерни өмек-дөмек болзун дээш эккелдивис. Олимпийжи курлавырлар училищезиниң спортчуларының өмүнээзинден тускай шериг операциязында киржип турар чаңгыс чер чурттугларывыска тиилелгелиг чанып келирин күзеп, оларның маадырлыг, эрес-дидим чоруу дээш четтиргенивисти илередип тур бис. Чаңгыс чер чурттугларывыстың чагыын күүседип турарывыс ол. Бот-боттарын кадагалап, карактажып, тура-соруктуг чоруурун күзээр-дир бис» – деп, Армияның төп спортчу клувунуң ТР-де салбырының директору Буян Биче-оол чугаалаан.
Ол хүн ТР-ниң Роскадыкшылхайгаарал органы база гуманитарлыг дуза кылдыр автомобильди штабка эккеп хүлээткен.
«Бөгүн 2014 чылда үндүрген «Газель» маркалыг автомобильди Улусчу фронтуну таварыштыр тускай шериг операциязында киржип турар чаңгыс чер чурттугларывыска дамчыдып тур бис. Ажылга аай-дедир сургакчылаарынга ажыглап турган машинавыс чүве. Машинаның техниктиг байдалынга хамаарыштыр «тергиин» деп үнелелди берип болур. Бо чорудуп турар автомобиливисти 55-ки мото-адыгжы (даг) бригаданың медицина кезээниң ажылдакчылары ажыглаар.
Организацияның бир дугаар дузазы эвес-тир. Ооң мурнунда акша кылдыр-даа, чылыг идик-хеп-даа кылдыр чорудуп турдувус» – деп, ТР-ниң Роскадыкшылхайгаарал органының удуртукчузу Алла Намдак тайылбырлаан.
«Автомобиль хереглеп турарының дугайында чагыг ТШО-да киржип турар чаңгыс чер чурттугларывыстан шагда-ла келген турган чүве. Кажан ТР-ниң Роскадыкшылхайгаарал органы автомашина бериксээн күзелин илередирге, өөрүшкү-биле чөпшээрешкеш, хүлээнип ап турарывыс бо. Балыгланган дайынчылар аай-дедир сөөртүрүнге ажыглаар кылдыр тодараттывыс. Өске-даа гуманитарлыг дузаны штабта чыып турар бис. Автомашинаны ноябрь 22-де чорудары планывыста көрдүнген» – деп, Бүгү-российжи улусчу фронтунуң ТР-де салбырының удуртукчузу Саима Далчин чугаалаан.
«Тускай шериг операциязында киржип турар чаңгыс чер чурттугларывыска кыш соок удур дуза кадып, буянныг үүлеге киржиксеп турар чонувусту Кызыл хоорайның Кызыл партизаннар кудумчуда 30 дугаарлыг бажыңда 106 дугаар кабинетке кээрин дыңнадып тур бис» – деп, Улусчу фронтунуң исполкомунуң координатору Чодураа Чаш-оол дыңнаткан.
Айдың ОНДАР.
Авторнуң тырттырган чуруу.
“Шын” №88 2023 чылдың ноябрь 18