«Социал хөмүр-даш» төлевилелиниң деткимчезин ооң мурнунда чүгле хөй ажы-төлдүг болгаш эвээш орулгалыг өг-бүлелер ап турган болза, бо чылын оларга тускай шериг операциязының өг-бүлелери база немешкен. Оларның санынче чоок кижизин дайын шөлүнге чидирген, ис чок читкен шериглер болгаш бертик-межел арткан дайын хоочуннары кирип турар.
Сүт-Хөл кожууннуң чагыргазының деткимче төвүнүң даргазы Римма Доржунуң ук кожуунда «Социал хөмүр-даш» деткимчезиниң дугайында тайылбыры:
— Кожуунувуста ниитизи-биле 89 хөй ажы-төлдүг база амыдыралы чегей өг-бүлелер «Социал хөмүр-даш» төлевилелиниң деткимчезин алыр даңзыже кирип турар. А тускай шериг операциязының киржикчилериниң 29 өг-бүлези социал төлевилелдиң деткимчезин алыр. Өг-бүле бүрүзүнге 2,145 тонна хөмүр-даш онаажыр. Социал хөмүр-даш төлевилелиниң деткимчезин алыр өг-бүлелерниң саны чылдан чылче эвээжеп олурар. 2023 чылда 100 элээн ажыг өг-бүле даңзыже кирип турган болза, а 2025 чылда 104 өреге күрүнениң бо деткимчезин алган чүве. Бо чылын хөй ажы-төлдүг өг-бүлелерниң саны 81 апарган. Ынчалза-даа тускай шериг операциязының киржикчилериниң өг-бүлелери-биле хөмүр-даш алыр улустуң саны ниитизи-биле каттышкаш, 110 өреге даңзыда бар. Социал төп хөмүр-даш алыр өрегелерниң даңзызын чазын-на тургускаш киирипкен бис. Одаар чүүлдү 2025 чылдың декабрь 31-ге чедир бажыңнарынга чедирер. Келир чылын ук төлевилелдиң деткимчезин алыксаар хамаатылар бар болза, февраль–март айларда социал төпке келгеш, билдириишкин бижээш, ада-иезиниң болгаш 14 хардан өрү назылыг уругларның паспорттарының, назы четпээннерниң төрүттүнген дугайында херечилелиниң, кижи бүрүзүнүң СНИЛС хоолгаларын, чурттап олурар оран-савазының документизин, сөөлгү үш шалыңының справказын хоолгалааш дужаар.
«Социал хөмүр-даш» губернатор төлевилели чурттакчы чоннуң социал байдалы кошкак бөлүктеринге одаар чүүлдүң адрестиг дузазын көргүзер дээрзи билдингир.
Айдың ОНДАР.
Чурукту маадырның архивинден алган.
«Шын» №41 2025 чылдың октябрь 23