Эрзин кожуунда тускай шериг операциязынга чок болган оолдарның аваларының комитеди бар. Ону Айсула Александровна Намзын чогумчалыг, шынарлыг удуртуп, аваларга моральдыг дузаны үезинде чедирип, аразында эптиг-демниг ажылдап турарлар. Оларга тус черниң кожуун чагыргазында өрээлди аңгылап берген, ында чыглып, сүмележип, бот-боттарын деткижип чоруурлар.
Май 31-де Качык школазынга мээң оглумнуң, ТШО киржикчизи А.М. Чоодунуң, чырык адынга тураскааткан кожууннуң башкыларының аразынга хол бөмбүүнге маргылдааны организастап эрттирдивис. Аңаа Эрзин, Нарын, Кызыл-Сылдыс, Мөрен, Качык сумулардан база Эрзинниң Спорт школазындан ниитизи-биле 6 команда киришкен.
Маргылдаа дыка солун болгаш бедик көдүрлүүшкүннүг эрткен. Организакчылар команда бүрүзүнге эки киржилгези дээш, хойларны берген.
Оюннуң түңнелинде Эрзинниң Спорт школазының командазы тергиидээш, 50 муң рубль-биле шаңнаткаткан. Ийиги черде Нарын школазы – 30 муң рубль, Кызыл-Сылдыс командазы 15 муң рубль шаңналды ап, 3-кү черге төлептиг болганнар.
Номинация аайы-биле база тускай шаңналдарны тывыскан. Нарын школазының орус дыл башкызы Нана Шой «Тергиин ойнакчы» деп атты, «Тергиин камгалачы» — Кызыл-Сылдыс школазының математика башкызы Динара Баадыр, «Тергиин көдүрүкчү» — Нарын школазының аныяк башкызы, «Тергиин камгалакчы» — Мөрен школазының чурулга башкызы Баазан-Доржу Кулдун олар чаалап алганнар.
Оглум Александр Мунзукович Чооду Качык школазынга ажылчын базымын эгелээн. Школаның коллективи оглумнуң ээлдек-эвилең, ажылынга кызымак чораанын мактап чугаалаарлар. Ол дээш өөрүп, оглумга чоргаарланып чоруур мен.
Чечекмаа САДИ, ТР-ниң алдарлыг ажылдакчызы.
Эрзин кожуун.
“Шын” №27 2025 чылдың июль 17