Январь 18-тен 19-че дүне Крещение байырлалында чаңчыл ёзугаар хөй-ле кижилер дошта крест дүрзүлүг кылдыр ойган сугже шымнып кирерлер. Ынчалза-даа бистиң агаар-бойдузувустуң байдалында доштуг сугже кирери организмге багай салдарны чедирип болур. Ынчангаш Крещение эжиндириишкининге баш удур белеткенип алыры чугула.
Доштуг сугже кирер деп турарларга Республиканың кадыкшыл болгаш аарыгларга удур хөй-ниити төвүнүң терапевт эмчизи Наталья Агапова кол дүрүмнерни сагыырын сүмелээн. Байырлал дүнезинде эштирде, тускай дериттинген ойган дошче камгалакчылар болгаш эмчилер көрүп турда кирери чугула. Шак ындыг черни Крещение байырлалының мурнунда хөй кижи эжинзин дээш, Вавилин ээтпээниң чоогунга айыыл чок болуру-биле тускай дерип тургаш кылып каар.
Сугже кирер мурнунда идикти ужулбайн, хөрек кезээнге кандыг-бир чылыг чүүлден эштип алыр. Доштуг сугже кирер мурнунда, мага-ботту изиргендирип, шимченип азы шошкуп ап болур. Ынчалза-даа хөлүн эрттир албаданмас. Сугже бажы-биле кирбезин сүмелеп турар.
Хөлүн эрттир доңмазы-биле, ойган дош чанынга бир минутадан хөй турбас. Соок сугга кирерге, чүрек дүргедей берип болур. Ол черле ындыг болур ужурлуг дээрзин билзе чогуур. Сугдан үнүп келгеш, дүрген-не кургаг хептен кеткеш, чылыг черже кирер. Аргалыг болза, термоска чылыг шайдан бодунга ап алыры күзенчиг.
Сугже кирер мурнунда-даа, үнүп-даа келгеш, арага шуут ижип болбас. Арага дамырларны алгыдыптарга, мага-ботта чылыг хөй чарыттынар. Ол ышкаш таакпылап база болбас. Хан аргыжылгазы баксырап, организмниң доңары дам баар.
Грипп, ОРВИ, Сovid-19 дээн ышкаш аарыгларның бичии-даа демдектери бар болза, сугже кирерин оралдашкан ажыы чок. Дегдирип, каданнап, берге байдалдар тургустунуп болур. Улуг назылыг улуска болгаш бичии уругларга ёзулалдың ажыктыг болуру чигзинчиг. Чүге дээрге аарыг-аржык өөскүп турар үеде оларның кадыкшылы кошкай берген болур.
Чүрек-дамыр, эндокринниг системаларда, тыныш органнарында, бүүректерде, чүстерде хоочу аарыгларлыг болгаш ханының базыышкыны улгадыр улусту соок сугга эжинмезин эмчилер сүмелеп турар.
Чыжыргана СААЯ.
Чурукту интернеттен алган
“Шын” №3 2024 чылдың январь 17