Октябрь 10 — Психиктиг кадыкшыл хүнү

ДУЗА ДИЛЭЭРИНДЕН ЭПЧОКСУНМАҢАР.

1992 чылдың октябрь 10-дан эгелээш психика талазы-биле кадыкшылдың хүнүн демдеглеп эгелээн.

БАЙЫРЛАЛДЫҢ ТӨӨГҮЗҮ

Эң-не эгезинде массалыг информация чепсектеринге кижиниң психиктиг кадыкшылы-биле холбашкан темаларга дамчыдылгалар болур чораан. Баштайгы үш чылында делегей чергелиг дорт эфирге чоннуң айтырыгларынга специалистер боттуг харыыларны бээр турган.
2002 чылда медицинаның эртемдени, РФ-тиң Кадык камгалалының кол психиатры Татьяна Дмитриеваның эгелээшкини-биле ук байырлалды Россияга демдеглеп эгелээн. Оон эгелээш бо хүннерге чедир сагыш-сеткили аараан улуг-биче чоннуң психиктиг кадыкшылынга хамаарышкан темаларны чылдың-на чырыдар апарган.

ПСИХИКТИГ КАДЫКШЫЛДЫ КАНЧААР КАМГАЛАП АЛЫРЫЛ?

Кадык болур дизе, аарый бергеш эмненир эвес, а аарыгны болдурбазының баш удур хемчеглерин чорудар. Кижиниң мага-боду-биле психиказы тудуш. Психиктиг кадыкшылды деткииринге элээн каш сүмелер:

- Хонукта 7 – 8 шак иштинде удуур. Чүге дээрге уйгу кижиниң мага-бодунуң клеткаларын катап тургузар.

- Спорт-биле өңнүктежири, шын чемненири – кадык хан-дамырның, быжыг нерв системаларының болгаш оожум психиканың таваа.

- Бодунуң кылыксаары ынак чүүлүн үргүлчү кылып каап чорууру (хобби).

- Хөглүг, солун, бурунгаар тура-соруктуг улус-биле аралажыры.

- Бодунуң сеткилин ажыдып, чугаалап билири. Хомудаан сеткилин улуска чугаалавайн, шыгжап чоруурга, кижиниң психиктиг кадыкшылынга алызында барып, багай салдарлыг болур.

Психиктиг кадыкшылы, сагыш-сеткили дээш сагыш човаары бирги черге турар ужурлуг. Чылдың-на угаан аарыындан 450 млн кижи когарап турар. Угааны солуудаар аарыгдан эр улус элээди назынында, а херээжен улус 30 хар чоокшулап тургаш аарыыры илерээн.

Бо берге үеде силерни ук айтырыгга хамаарышкан бодалдар дүвүредип турар, а бодуңар аңаа харыы тыппайн чоруур болзуңарза, тускай специалистерден дуза дилээринден эпчоксунмаңар.

Дараазында дугаарларже кайы-даа үеде долгап, консультацияны ап болур силер.

8-800-2000122; 8(39422)6-00-07; 8963204900

Урана ДОНГАК,
Клиниктиг психолог.