СОНЕТТЕР ДИЗИИ
(Төнчүзү. Эгези №36, 38, 40 "Шында")
13
Он дөрт янзы чечектерден боодал кылдым.
Олут-дыш чок сагыжыңар оожургазын.
Ак-көк, кызыл, сарыг, ягаан челээш ышкаш
Арыг чаагай саглаңнашкан сеткил сөңү.
Чеже арттар, чеже хемнер кешпедим дээр,
Черим-чуртум делгемнерин эргээним шын.
Оргаадайны, казылганны, шеңне чечээн
Оран-таңдым олча-кежиин сүзүп хандым.
Мөңге бойдус айызынга бүргеттиргеш,
Мөөң күштү мага-ботка мөөңнеп алдым.
Ажыг дерим төге-төге, чүткүп чор мен,
Ажыл-ишке сени дөзээн ачым ол-дур.
Оларымны оваарыптар бүдүш барда,
Он бешкизин база немей сунайн, авай.
14
Он бешкизин база немей сунайн, авай.
Оозу чокта долу куспак кайын чедер.
Чогаалымның эң кол сөзүн киирбезимге,
Чогуп-бүтпейн, утказы чарт үндүнмес боор.
Уран-чечен одуруглар эвээш-даа бол,
Улам ханы чиге кылдыр бижиийн, авай.
Хары черже ужугуптар үең кээрге,
Хараадалдан карак чажы туттунмас-тыр.
Карактарга хондур-дүндүр көстүп-көстүп,
Хаяа-даңда хенертен-не чиде бердиң.
Чаңгыс дүне аалдап келген овуруңар
Чаагай дүш бооп база катап эглип келзин.
Бижээчиниң сонет чечээ дооступ турда,
Бириккен Дүн Деңгер-биле ойнап хонар.
15
Бириккен Дүн Деңгер-биле ойнап хонар.
Бирги чечээм хүндүткел дээш сунайн, авай.
Ишти-хөңнүм дакпыжагдан адырылзын.
Илдик чокка эрткен орууң херечилээр.
Дөргүл-төрел хүндүткелин чаалап алдың.
Төрүттүнген кавай чурттуң сени утпас.
Ынаныжым адырылбас доңу болзун.
Ынакшылым авам сеңээ төнчүзү чок.
Хөрек-чүрээң уярадыр өөртүп чорзун.
Хөглүг-баштааң ам-даа улай сорук киирзин.
Удазын дег харылзаавыс быжыктырзын.
Угуң-дөзүң үзүктелбес чылдагааны.
Он дөрт янзы чечектерден боодал кылдым.
Он бешкизин база немей сунайн, авай.
Юрий ТУҢ-ООЛ.
«Шын» №42 2024 чылдың июнь 8