Онча-менди чанып келзин

Чыл кандыг эрткенил?
Тываның Чаан мөгези Сайын-Белек Тюлюш:

– Бо чыл ниитизи-биле багай эвес болду. Өг-бүлемде үш ажы-төлүм, 7-ги классчы оглувус, 5-ки классчы кызывыс болгаш уруглар сады барып турар оглувус, өөм иштиниң каң кадык болуп чылды үдеп турарывысты канчап багай дээр боор. Ол ышкаш ажыл-иживис чогумчалыг болду. Спортчу амыдыралымда бо чылын Наадымга 4 шыырак мөге аразынче киргенимни, Орёл хоорайга болуп эрткен Россия чемпионадынга болган сумога үшкү черни ээлээнимни улуг чедиишкин деп санап турар мен. База бир өөрүнчүг чүүл, чоокта чаа “Спортчу элита” деп хемчегге 3 сая рубльдиң сертификадын тывысканын канчап демдеглевес боор. ТР-ниң Чазаанга, Спорт яамызынга болгаш бүгү аарыкчыларымга күдүк базып мөгейдим, четтирдим! Тываның улуг-биче чонунга шуптузунга кел чыдар Чаа чыл-биле аас-кежикти, быжыг кадыкшылды, тайбың дээрни күзедим! База бир эң улуг күзээшкиним, ТШО-да бистиң оолдар шупту онча-менди чанып келзин деп йөрээдим!

Карина МОНГУШ.

«Шын» №100 2023 чылдың декабрь 30